逃跑日誌

追悼

2010-04-01T20:35:00.009+08:00

個性使然, 從來我都喜歡參與多於旁觀.

喜歡落場踢波, 但不熱衷睇波.
喜歡演話劇, 但絕少看話劇.
喜歡唱Karaoke, 但不喜歡看演唱會.

記憶中, 對上一次去看演唱會,
是輝黃演唱會(!), 還只是被母親拉去.

但, 上星期六, 我和太太倆去看了陳奕迅演唱會.
還是我主動拜托朋友張羅兩張演唱會門票.

我很想很想很想現場看陳奕迅.

我從來沒有偶像, 也不追星.
但陳奕迅我是打從心底裡欣賞, 是天生的歌者.

你會見得到, 他很享受舞台, 很喜歡唱歌.

更重要的是, Eason 絕大部份的歌, 標誌著我的青春時代.

我到今天仍清淅記得,
當日隻身遊走於柏林某公園內,
一邊散步, 一邊旁若無人地高唱"我的快樂時代".

那是真正我的快樂時代.

而近年來他的歌,

更能觸動我這些七十後的情懷,

這大都是黃偉文惹的禍.

入場前我早已有心理準備,
相信聽到現場"陀飛輪"時, 我一定會流淚.

然而, 原來我比我想像中眼淺.

第一首"今天等我來"時, 我已情不自禁了.

只能夠舉起相機扮影相來稍作掩飾.

還有之後的落花流水七百年後陀飛輪沙龍葡萄成熟時我的快樂時代.

那晚, 是我的青春光陰追悼會.

原來是1998年, 十二年過去了......

重要

2010-03-27T16:19:00.004+08:00

原來, 我真的逃跑了一段時間.

差不多整整三個月了.

三個月之間, 發生了很多事情.

其中發生在我生日的那天的事件, 著實困擾了我好一段時間.

對於那那徬徨抓狂, 手足無措, 歇斯底里, 坐立不安的日子, 猶有餘悸.

我曾以為自己是一個冷靜鎮定, 泰山崩於前仍毫不畏懼的人.

但原來, 當事故真的發生時, 我並沒有我想像中堅強, 甚至非常失禮.

回想起來, 我懷疑在那一段日子中, 我甚至有輕微抑鬱症.

現在事情暫時算是過去了, 對於我已是一個很好的教訓.

人只有在低潮的時候, 才會重新認真的審視自己.

明白到什麼才是對自己最重要的.

我回來了.

終於

2010-01-12T16:27:00.006+08:00

OK~ Finally.

2010 年, 終於有一件事情,

符合我預期推理, 而沒有令我失望.

終於, 新年快樂.

抑鬱

2010-01-11T10:41:00.004+08:00

心情抑鬱持續.

有關相機器材的憂慮解決了 -- 舊鏡修好, 新鏡抵埗.

可是成績方面的事情仍難以釋懷.

對於付出未能獲得預期的回報,

自己仍然未能找到一種適當的心情來面對.

我本來相信自己實力, 努力亦會得到基本回報.

然而這事之後, 令我懷疑其實過去只是自已一向好運,

也許世事本就難以半斤八兩, 合該如此.

姑勿論如何, 這可算是近年來對於自信心一個不大不少的打擊.

上星期到校務處查詢有關上訴成積的事宜.

原來可以上訴的情況是非常有限,

比起中學會考的複檢機制還要不濟, 還要封閉.

和曾在大學工作過的太太說起, 她似乎早知結果,

無怪她說:"大學其實是一個相當黑暗的地方. "

總之, 整件事情令我覺得自己相當之天真又幼稚.

感覺沒趣, 卻又無可奈何.

天, 無端很晦暗.

近況

2010-01-05T10:33:00.005+08:00

- 由2009年病到2010年, 咳了整個月還未痊癒.
- 新買的鏡還沒有多拍, 就入了深切治療部.
- 第一次用ebay網投以外的交易, 心情忐忑.
- 一封用私人署名但屬於公事上的信, 在政府部門中引起了不大不少的反響.
- 私務因為上面的公務, 很可能有點影響. 這是蝴蝶效應.
- 成績令人意外地差, 卻沒有忿怒: 當你忽然見到外星人時, 應該只會驚訝, 而不會忿怒的.

新年才開始, 不知是行了什麼狗屎運.
總之事事糾纏不清. 比我的案頭還要混亂.
期望都落了空, 沒有一樣可以了結善終.
然而我卻沒有什麼反應, 可能喝多了咳藥水,
亦可能是根本不知怎麼反應.

哀莫大於心死.

很多事情, 開了個頭, 其他的都不由自主.
根本不能更變什麼, 幾乎連掙扎呼叫都不能.

只有承受.

2010年初, 除了那一碟"香茅豬扒飯.多蔥" 以外,
似乎並沒有什麼值得慶賀的事.

午餐實在應該去吃多個"香茅豬扒飯.多蔥", 沖喜一下.

元旦

2010-01-04T11:03:00.003+08:00

一月一日, 一早起身, 丟低老婆.
去三聯書店, 換左一隻心愛的聾貓公仔.

之後, 去左小巴黎,
食左一碟香茅豬扒飯, 多蔥!
蔥粒多得把整碟飯鋪滿.

2010年有一個美滿的開始~

推理

2009-10-31T09:37:00.007+08:00

放工離開公司, 在升降機中遇見了人事部總管彭小姐.

升降機中只有我倆.

若果彭小姐後生三十年而再貌美一點,
應該是挺美好的時光,
可惜偏偏她年紀外貌都像俞琤.

我們對望了兩秒,
似乎應該寒暄些什麼, 去打破那下降中的沉默.
可是,除了八年前入職時那不超過五分鐘的會面之外,
我們應該沒有什麼共同話題.
何況她也不會認得我, 開口搭訕太唐突.
但作為比她低級的職員,我仍禮貌地向她點了點頭.

之後, 不可思議的事情卻發生了.

"你是PPPMMM嗎?" 她說.
"彭小姐! 妳好厲害! 怎會記得我的名字?" 我訝異莫名.
"公司越來越大, 太多人, 也真的記得不那麼多了...在這裡多久了?"
"...大概七八年吧." 我抹去了中間出走的一年.
"啊~ 那麼久了...Bye Bye~" 升降機到了地面, 她離開了.

彭小姐當然不會看我的網誌, 更不會認出PPPMMM 就是我.
那PPPMMM 是我的本名, 但那已經夠不可思議的了.

我只是芸芸近千個員工中的一個中層小職員.
八年前的一個照面, 居然到今天仍記得? 記憶力驚人啊!

不過,從升降機步出後十步之內,我卻推理出另一個故事來.

如果能夠見微知著,當然是件值得高興的事.
然而煩惱自尋,有很多事情,可以的話,還是不要透支的好.
何況,推理是否成立, 還是兩半.

專心點溫書, 考完試再說.

不安

2009-10-31T09:25:00.004+08:00

近日有很強的不安感.
相信主要來自學業方面.

越不安就越不能集中,
越不能集中就越追不上,
越追不上就越不安.

不知點算好......

讀音

2009-09-28T10:53:00.004+08:00

某日在 7-11, 我拿出iphone, 拍了這一張.
太太問我拍什麼, 我笑而不語.

事情是這樣的.

某日行過報攤, 見到這本雜誌.
以下是當日短短數秒間的思路...

"嗯... 王菲封咪(me)嘛..."
"嗯??? 王菲有咪(me)嗎...?"
"唔...應該是王菲封咪(mic) 吧..."
"但...王菲的咪(mic) 不是封了很久了嗎?..."
"呀...究竟是咪(me)還是咪(mic)..."

嗯... 是的, 我知道我是很無聊.
要怪, 就怪林志玲好了.

公轉

2009-09-04T10:27:00.010+08:00

最近, 公事上需要找我的大學教授做一些學術性報告.

師生十年不見, 也談不上什麼交情,
不過教授頗懂得順藤摸瓜之道.
因其學生希望到發展商工作.
公事上三句未完, 第四句便向我推薦了他旗下一愛徒.

份屬同門, 提攜師弟乃師兄應有之義.
遂請師弟先電郵了履歷表給我.

該師弟成績亮麗, 建築系畢業後,
還到英國修畢為期一年的法律文憑課程, 前途無限.

然而, 其缺點卻在於未有實戰經驗,
未知是否金融海嘯影響, 去年畢業後未曾工作,
卻先轉往外國進修, 隨後跟教授做學術研究,
故此於未曾有任何戰績可供參考.
而且叫價太高, 未有任何認可專業資格及經驗,
要求薪金卻猶如一個註冊建築師.

明顯地, 他是一個典型的學園天之驕子,
在現實世界中, 卻自視過高, 亦有點天真.

學園畢竟只是一個封閉而受控的環境.
學歷成績只是會令人起步容易.
真正能令人可以在社會立足的, 是戰績和實力.
社會已經受夠了高份低能.
沒有往績而要單憑學歷站在高位,
那多半是看得小說太多.

本想電郵回覆婉拒, 想了一想,
卻認為更應該跟那年輕人談一談.
於是撥了電話, 把我的想法跟師弟說了一遍.
並建議他, 若果志不在學術研究,
應盡快投身社會, 爭取經驗.
別學壞師, 也別好高騖遠.

主要原因是, 漂亮的學業成績雖然有利起步, 卻是有限期的.
數年之後, 沒有人再理會你會考高考大學成績有多少個優.
為了令學業成績功效最大化, 應趁那台戲還可以唱就盡量唱,
越早唱, 就能唱得越響.

說完, 師弟唯唯諾諾.

再問一下, 為什麼一起步就希望到發展商工作,
而不先去當一下則師, 待得考了牌才考慮轉型?

"因為發展商既有建築部, 又有法律部,
在發展商工作, 我可以在建築部邊做邊學邊考牌,
之後又可以轉到法律部學師, 那不是很好嗎~?"

我啞然.

"商業機構不是學園, 做的是買賣, 他們要求的人材, 是現買現賣的,
為什麼要對你栽培? 投資在未能確定的回報上?

想到那裡就到那裡去, 那當然很好啦. 可是這不是你爸的公司.

要學師也不是不能. 不過通常一位 Management Trainee 人工,
只是你所要求的1/3."

結果, 我做了一回哥伯尼,
告訴那天真的小朋友, 縱使在學園中他有多明亮,
然而, 世界並不是圍著他來轉的.

旅行

2009-08-20T09:11:00.005+08:00

下週將和父母到東京旅行.

我遊過的地方算多, 可是父母卻沒到過幾處.

一直以來, 我都很有點歉疚. 很想帶他們去外旅一次.

今次算是圓了自己小小的心願.

記得小時候曾和母親說, 長大後會帶她到豉油街.

為何是豉油街? 已記不起了.

總之就是曾經如此說過. 母親也常提起.

從前父母帶我去玩, 現在我帶父母去玩,

完全的換了個位置.

父母老了, 我長大了.

兩者, 我都不情願. 卻是無可奈何的事.

情感上雖然不爽, 但旅行還是很令人興奮的.

唯一的遺憾, 是能力所限, 未能帶同老弟一家去.

在我畢業之前, 希望我可以有足夠的能力, 帶同全家一同外遊一次.

荒謬

2009-07-28T22:53:00.005+08:00

近來, 私務繁忙.

所謂"私務", 就是私人業務, 秘撈外快是也.

我們這行的外快, 與其說是出賣"專業知識",
倒不如說是出賣"專業資格", 更為貼切.

有很多人, 沒有知識但有資格, 也可以撈點油水,
但沒有資格, 有知識也沒用, 什麼也做不了.

就算做了也沒有人信.

只要有專業資格, 一個簽名, 名付其實的成千上萬.

最近其中一個外快,
屬於沒有什麼法律責任的可行性研究報告.

所謂的可行性研究報告,
其實也沒什麼好研究, 結果我是早知的嘛!
不過簡簡單單用口講就是不行, 不收錢的就是不可靠.
人家就是不信, 硬是要花錢要我搞些黑紙白字的報告來.

也好. 人家愛花錢, 卻之不恭.

做這些報告, 難度在於如何將一句簡單的"可行"或"不可行",
轉化成洋洋灑灑的千字文, 以及如何令人家覺得物有所值.
精於此道者需要有一種"無事化小, 小事化大"的逆向思維.
總之要鉅細無遺地自圓其說.

我倒是很認真的幹, 花了一個星期天,
文字堆砌了四頁, 搜集了些資料, 又畫了些簡圖.
今天拿了正本副本報告各一, 到了客戶處講解前文後理.

事後, 放下了正本, 取回了副本, 以及一張支票.

同一句說話, 由一個收了顧問費的人口中說出.
好像忽然會變得可信, 份外心安理得, 真是奇怪.

途經銀行, 把剛接過的支票存了.
櫃員機旁有個垃圾桶, 也順手的把副本丟掉.

忽然間, 覺得很荒謬.

原來, 人家花近萬元, 買了數頁我不屑一顧的廢物.

大概, 我們每天都在用自己過度剩餘的, 去換取所需.

銷假

2009-07-20T16:48:00.003+08:00

四個大字: 失望之極

即時銷假.

假期

2009-07-19T19:07:00.004+08:00

考試過後, 不用每天晚上溫習, 不用記掛著功課,
算是放了兩星期的假.

閒來就拿相機亂跑亂拍,
上過山頂, 坐過纜車, 到過大澳, 見過大佛.
仿如自由行一般. 燒掉了不少底片存貨.

週末就呆在家中, 沉迷閒書,
或者在星巴克中看小說. 或者大吃大喝,
總之要感覺悠閒.

再多一星期左右, 把手上一本小說幹掉後,
大概就要開始備課吧...

課題

2009-07-03T09:13:00.016+08:00

第一個學年完結了.

昨晚, 是本學年最後一個考試.

回想起來, 中大的考試也真多.
一年共考三次, 平均三個月來一下. 頗為疲於奔命.

若果發現本部落格整個月也沒有什麼更新,
不用問了, 我正準備考試中.

除了建築這個也文也武的科目以外.
過往十幾廿年學生生涯, 自己讀的主要是理科,
對於今次修讀一科純純正正的文科, 有頗深的感受.

日日夜夜對著一堆文字,
沒圖畫, 沒數字, 沒公式, 感覺既新鮮又困惱.
純文字的學術鑽研, 感覺更像一個讀書人.

可能我本身多少有點自虐及自閉的傾向,
縱使許多時候都是不明所以或一知半解,
但我甚為享受獨個兒堆頭苦讀的感覺.
偶爾能把道理讀通, 是一件很令人愉快的事.

過往我絕少有關文科的學習心得和考試經驗.
一年以後就明白到, 修讀交科, 個人筆記眉批是非常重要.
而文科的考試, 難度是在於如何令到對方知道你明白.
(這句有點夾纏不清, 又有點像廢話...)

最後, 字太醜的人, 注定讀文科會吃虧...... -.-!

考試完了, 實在也沒有太多開心放鬆的感覺. 反而有點空虛.

經過三小時不停的作答後, 腎上腺素和血壓急升.
步出試場一剎那, 腦中忽然閃過"讀來幹嗎?" 這個問題.
但我不敢太深入探討這個課題,
因為我知道支持行為的客觀理據不算充份.
暫時就當我是用四年時間去自我証明和自我滿足好了.

還有三年, 路仍然很漫長.
多少需要有點傻勁蠻幹,
才可以支持自己如此去花金錢精神和時間.

暫時我比較關心的課題,
仍然是今次考試能否取得B+以上, 用以挽回之前失地.

二廠

2009-06-08T01:06:00.000+08:00

近日, 和損友夾份開左個blog,
講相機, 講器材, 講照片.

我們都愛玩連動相機 Rangefinder,
最初我話:不如個BLOG叫 Rangefinder Together 啦,

後來, 因為我們亦不止於rangefinder 一樣,
有DSLR, 有雙反, 也有中幅.
咁我就話: 不如個BLOG 叫 Rangefinder and Other All Together 啦.

又後來, 有人話, 不如有型D,
好似日本雜誌咁, 叫Camera People 諸如此類.
結果我話: 人地叫 Camera People, 咁不如我地叫 Camera Mammal 啦~

請多多支持Camera Mammal (http://cm.media.cn)~
應該比這裡更有趣一點.

蜑家

2009-05-24T13:35:00.005+08:00

週日, 下大雨,
天色陰沉得像夜晚.

連出外走走也不願的日子.
最好的, 莫過於開個冷氣,
伏在床上, 靜心看書.

看得倦了, 只要一倒下, 就可以昏睡去, 很方便.

床邊窗檯都被我的書本霸佔了.
有文具有檯燈, 像書桌一樣.

我們都愛在床上對著筆電各自工作.
又因為床頭有電視, 客廳和飯廳,
大部份時間是款客時才開放使用.

我常對太太說:
其實我們不需要買樓, 只要租個百幾呎板間房,
有一張床, 都夠我們活動了.

有時我懷疑, 其實我們是蜑家人,
習慣了有限的活動空間,
以前限於艇上, 如今卻限於床上.

上了岸, 卻改不了習性.

一點

2009-05-19T09:07:00.005+08:00

考試多年, 只有兩次,
我是在收到成績單之後, 有衝動想去查卷.

第一次, 是收到高考中文科的成績時.
第二次, 是昨天收到的顧傭法成積時.

付出與收入不成比例, 此其一,
其次是我也想不出我做錯了些什麼.
百思不得其解, 不明不明的, 很不忿.

就是這一科, 把總體成績拖低了.
還欠 0.1 分, 才達到今季原本目標.

就只差"點一"這一點.

很不忿很不忿很不忿!

其實成績也不算是很差.
只是同心目中的預計相距太遠.
而且不達標就是不達標.

結果, 只能一人生悶氣. 埋頭讀書.

還好的是, 暑假修的法哲學, 是我有興趣的.
年青時有一段時間沉迷哲學,
大學選科時第四選擇就是哲學系.

暑假學期短促, 只有六個星期.
要看完所有文章已經不易,
更別說完全消化法哲學的理念.
只能指望依靠一下十多年前儲下的老本幫助理解.
希望期終試時別再要生意外.

未來三年, 尚餘十七科,
計一計數, 要達到終極目標,
就要有9科獲A級, 其他均要有A-或以上......

難矣哉.

閒角

2009-05-16T09:04:00.003+08:00

尋日團長電話一到, 今年又有戲開~

雖然功課很忙, 對舞台劇卻也不能抗拒.
相識十多年, 大概團長也明白,
這個傻仔只要有戲做, 永遠隨傅隨到, 永無say no.

分別只是我由當年的必然男主角,
轉為閒角, 即係大茄~XD

起初是有些不情不願.
小配角花在排練的時間不比主角少,
有時等埋位一小時, 排就排十五分鐘.
出場時間可能只是數分鐘, 甚至數十秒,
付出和收入不成正比, 不過癮.

或許在現實生活中, 我一直都能吸引人的目光.
對於我來說, 不能出眾的話,
所做的一切都是沒有意義的.

我是英雄主義者, 不明白平凡的價值和位置.

不過, 撈得一兩次閒角就會明白.
我不做, 也總要有人做,
雖然不是很重要, 卻也不能沒有你.
沒有閒角好多場口就不能過場,
不能承接, 不能襯托, 不能對比...
戲就不成戲了.

不喧賓奪主, 平凡的存在,
單單是為了成就整體.

閒角也有閒角的意義.

其實, 有誰的一生, 都能一直做主角呢?

流淚

2009-05-12T09:20:00.002+08:00

那天應該是考試前的某一日.
我和同學一起溫習完畢後,
獨個兒跑去做腳底按摩.

在一小時的按摩過程,
我把整個鏗鏘集節目看完, 眼淚是一直沒有停過.

按摩師大既以為是我身體不佳, 所以痛得流淚.

離開以後, 跑到街上,
一想起剛才的故事, 又像瘋子般掉下淚來.
好久沒有被如此感動過.

讀了十幾廿年書,
對於好老師和所有致力教育的人, 我份外尊重敬仰.
而對於本地教育制定的荒謬, 感受也份外的深.

沒有好的教育, 就沒有優良的下一代.
也就沒有好的未來.

我覺得教育是很專業, 很神聖的事.
需要有一些使命感的人, 才會有狠勁去做.
然而對於香港現在扭曲的教育環境, 我是感到憤怒的.

不要跟我說什麼教育規範理念.
不能感動人心的, 不能導人向善的, 就不是好的教育.

談教育與學習, 十日十夜也講不完.

一個月過後, 回頭再寫這篇時, 鼻頭仍是酸酸的.

對於梁校長, 我致以最祟高的敬意.

你一定會有一大群好學生的.

人海

2009-05-11T09:07:00.002+08:00

因為有黑暗既地方就有光明, 有罪惡既地方就有正義.
有惠康就有百佳, 有大家樂就有對大快活,
有張國榮就有譚詠倫......

八十年代, 本地有樂隊組合,
有達明, 就有Radius.

當年, 我偏愛Radius, 主要原因是因為歌詞出色.
無他, Radius 的歌詞, 大部份由初出道的林夕包辦.
另外形象正氣亦是原因之一.

當時不懂得欣賞英倫電子風格的達明, 覺得音樂萎靡.
然而人越大則越喜愛黃耀明, 越妖魅的越喜歡, 這是後話.

現在講Radius,
可能還有人會記得不懂得孔雀開屏的周慧敏前男友,
Radius 主音陳德璋.
另一成員黄耀光的名字, 大概沒多少人記得吧.

"人海中我是誰"是八八年的歌. 距今二十一年了.
那時我還未成年, 對這歌卻有很深的認同感.
林夕的詞太好, 陪我也鼓勵我走過很多日子.
是我最喜愛Radius 的歌.

我相信這首歌還會陪我走過很多未來的日子.

原本有 MV 版本. 卻找到了 VIIV 版本,
週年臨近, 也許更有點意思.

人海中我是誰
<無線電視劇《人海綠皮書》主題曲>
　
作曲：黃耀光填詞：林夕編曲：黃耀光
　　
但願醒來活在孩童世代
不必支撐掙扎欺騙像眼前
但是當然被活埋人海裡面
慢慢總發現需要艱苦去演
　
曾糊塗期望會有別人觀看我的淚
還完全忘掉此際我是誰
是多麼的渺小眼淚流到咀邊最後
總要吞去誰曾顧慮
　
別再說半生不平事無需聽眾人海裡全是渺小的閒事
誰歡笑過誰哭過同樣獨自地面對種種結果
　
別再說太多的期望無需控訴人生裡原是鬥爭的長路
誰欺壓我誰幫我同樣也要靠我雙腳走過

傾情

2009-05-10T22:36:00.003+08:00

從小就聽收音機大, 很羨慕人家當 DJ.

數年前的某年某月某日, 因為一時興起,
朋友用極快的速度, 架起了一個網上一電台來.
終於有機會做一個非專業的DJ.
可以在網上電台中打碟播歌.

在那個搞網站電台的年代,
有時會跟幾個朋友搞一晚清談節目.
更多的是夜晚放工回家,
一有空就抽兩三個小時出來,
將自己房間變作播音室, 搞個播歌節目,
用左以前黃凱芹陳海琪既節目名, 叫"夜傾情".

本來, 我有所有節目的存檔.
可是是一次意外, 我把他們全都殺掉了.

棄我去者, 昨日之日不可留.
我卻忽爾很懷念那些日子.

多得youtube, 現在雖然我再沒有網上電台,
仍可以在網誌中分享音樂.

是夜, 把之前只有歌詞的網誌全都改了.
埳入了 youtube 的連結. 例如呢個

有聲有畫有文字, 近乎完美.
遺憾的, 大概只是沒有我的聲音吧~ XD

前台

2009-05-06T01:36:00.003+08:00

在上司對我說會提攜我那的一年，我離開了。

當年, 因為我自信，我不稀罕。
我認為以我的才幹，我可以獲得更多，
可以走得更快，更遠。

然而很快我就明白到，
商業社會並不是我想像中般運作。
有很多事情, 不是有自信有才幹就可以.
當中, 還需要有很多人願意提供機會, 願意信任.
才可以成就一個人, 一件事.

而我的自信和能力,
只能促使別人願意信任, 樂意提供機會.
卻不能保證什麼.

最重要的是, 我還很稚嫩.
根本未能通過壓力測試.
那是我認知以外的事情: 我以為我可以, 原來我不能.

結果, 一年後,
我就回到我原本的崗位上.
上司卻換了別個人.

以前跟我同級的人, 能力比我低的人,
甚至我看不起的人, 都已升遷了.

回去的初期, 總有些奇怪的目光.
好馬不吃回頭草, 總有一點耿耿於懷.
但那是任性的代價.

還好的是, 在外一年,
我了解到我的缺點和限制, 卻無損自信和能力.
在思想上對於向上爬的代價和壓力, 也有更確切的了解.

在論資排輩的制度下,
放棄了四年基礎的我得從頭來過.
我曾暗暗地對自己說過,
我要用最快的時間, 重回當年的軌跡.

差不多兩年過去了,
我比從前低調在意, 只默默地踏實地幹.
我獲得了信任, 也得到了機會.
慢慢地從後台跑到了前台.

下週, 我將會取代上司與我之間的那一位,
越級代表我的上司出席高層會議.

雖然我不斷提醒自己低調沉著冷靜
但一切能依我的劇本進行, 那感覺實在太好了~

有能者居之, 有什麼比這個更能肯定自我能力呢?

今天我的心情確實很爽, 很痛快.
明天的路, 卻還是要小心走好...

好玩

2009-04-28T20:08:00.005+08:00

原來幾近一整個月沒有更新了~

原因很簡單: 因為要考試.

最初報讀課程的原因單純得很.
是百分之一百名付其實的"沒事找事幹"
不過, 讀讀下, 發覺自己都可以很投入.

每當我投入的時候, 就會很緊張結果.
因為緊張結果, 就會投放更多心思去爭取好成績.

我一直認為: 只問過程, 不問結果.
是因為得不到好結果而自我安慰自欺欺人的說話.

其實, 只要投入, 就自然會享受過程, 也必然會緊張結果:
因為過程中真的有努力付出過.

換個角度也是一樣,
不論踢波也好, 捉棋也好, 打麻雀也好, 任何遊戲,
如果結果輸贏不重要, 好玩度即時減半, 也叫人難以投入.

打麻雀如果只係打手板, 我寧可去睡覺.

推而廣之, 有時我也會覺得,
如果我一生人只是日日返工放工上上網打打機.
沒有丁點目標, 也沒有幹過什麼有意義的事.
書是讀了很多, 卻對社會沒半點貢獻的話.
引用上面的思路, 一生也就沒有什麼結果, 算是白活了.

所以呢... 我近來常常希望抽一些時間出來,
幹些有意義的事, 算是曾經存活過的証明.

至於是什麼呢, 只有一個大概. 讓我再想一想...

應該是好玩的事.

又, 星期四晚上八時三十分考完所有試,
同日晚上十時三十分就上機過台灣.
WORK HARD PLAY HARD~ 又可以影相了~ XD

顏色

2009-03-31T17:25:00.002+08:00

Facebook 上 Quiz 泛濫. 非常討厭.

昨日, 我在 Facebook 上說:
連"你是男兒當入樽裡的那個角色" 呢類咁無聊既quiz 都有人玩.
無怪八婆雜誌的每週星座運程仍然有市場.

今日, 係公司無聊地上網亂click,
輾轉click 左入去呢度玩玩.

咦~ 又好似幾準噃~

由此証明:
1. 有口話人無口話自己
2. 人無聊起上來, 咩事都會做.
__________________________________

【Me原色組合】自覺橙色 + 潛質靛色 + 原生紫色

【盤旋型】善於周旋，進退得宜，非常懂得人際相處之道的人。
對於人際的觀察十分敏銳，總是以自身的安穩為考量，與人交往絕對不會做出危害自己的行為。重視事情的合理性，很懂得察言觀色，總是挑適當的時機作適當的事情，深諳人際相處之道的人。

【盤旋型‧Me原色組合色彩本質】

　。自覺橙色：正　向
　。潛質靛色：內在判斷
　。原生紫色：敏　銳

【盤旋型的外顯行為】
生活安穩對他們來說是重要的，並非沒有理想，只是認為要捨棄安穩來達成理想，風險過大。
忠誠度高，當面臨選擇工作時，都會花很長的時間考慮。是可以信賴、傳承的夥伴，將已經建立好的事情交給他們打點，多半都能夠鉅細靡遺的處理妥當，屬於忠心耿耿的左右手型的角色。
正向思考，深具道德感；不輕易被困難打倒，往往有著愈挫愈勇的毅力。

【盤旋型的潛意識】
會為自己設定階段性的目標，勇往直前，善用自己的能力，相信自己能夠達成設定的目標。對他們來說，經驗的累積很重要；很擅長運用過去經驗來處理正在發生的事情，通常都能夠圓滿的解決。
非常重視事情合理性，深信要解決問題必須找出問題的根源，快速地對症下藥，給人做事明快、有魄力的印象。
控制慾強，尤其在感情方面，有時會給人箝制很多的壓迫感。

【盤旋型的靈能意識】
公平而客觀地面對生命和人生，享受生命的美好，對人生充滿信心和希望。喜歡給予別人精神方面的幫助，也很容易獲得別人的幫助。
有強烈的內在覺醒和自己的主張，重視事件所帶來的啟發和警示。善於評估，對事物有自己主觀的意見，勇於面對問題，勇於挑戰困難。
真誠面對感情，是感情豐富且忠於自我感受的人，對人與人之間關係的變化非常敏感；面臨生命之中的感情挫折，會感到落寞、沮喪，但並不會因此而對感情不認真。和諧美好的感情關係能夠使他們加倍幸福快樂。
嚮往人際關係的和諧穩定，能讓他回歸內在，聆聽內心的聲音，找出合理且理性的處事方法。

字數

2009-03-30T08:50:00.000+08:00

早前, 有一份功課, 字數上限二千.

左寫右改, 增加刪減,
完成後按下"字數統計",
最終不多不少, 剛剛寫了二千字.

然而, 問題來了.

當時我諗:
啱啱好二千字? 邊有咁啱架~ 有無數錯架...
真係咁好野, 話二千字就真係二千字?
好唔好減少幾個字呢? 一千九百九十幾字咁, 好似好d 喎...

於是, 我開始刪減字數.
但減完幾個字後, 為著句子完整, 又要加番幾個字.
又經過一輪加加減減後, 再按一下 "字數統計"
頂~ 仲係二千字!

當時, 我認為已經無咩野可以刪減.

定神再諗一諗:
點解我會覺得二千字係有問題,
而一千九百九十幾字係會比二千字好呢?

那是完全沒有道理的嘛~ 我又無犯規~

於是就把那份二千字的功課送交了.

之後某日, 跟同學V聊起那份功課.
我說我寫了剛好二千字.

他的反應也是:
有無咁啱呀~ 話二千字就真係二千字?
你減幾隻字, 一千九百九十幾咁都好d 丫~

由此証明當日我對於"剛剛好二千字"的擔心是合情的.
但明顯不合理.

為什麼剛剛好二千字, 就會令人心生懷疑的呢?

我想了好幾天, 仍然不明白那是一個怎麼樣的心理狀態.

麥嘜

2009-03-26T09:21:00.011+08:00

大學時代, 一班大細路好喜歡睇黃巴士麥嘜.

當中麥太講俾麥嘜聽最有名既兒童故事係:
"從前, 有一個小孩子, 他不聽媽媽的話.
有一天, 他死了."
我們看完都笑得翻到~

今天, 在地鐵裡, 如常地"裝"隔離份報紙.
看見報紙標題: 小明唔食飯遭繼父肢解
即時就想起麥太的故事.

笑話發生現實中, 原來不那麼好笑.

開槍

2009-03-18T15:17:00.010+08:00

尋日有一宗警察開槍擊斃疑人案,
仲有一個有心人拍低左成個片段.
(點解會有人咁得閒走去拍片...?)

新聞有播果段手機拍既短片,
見到二人在糾纏, 警察不斷高叫:
"放低武器... 咪郁, 否則開槍....唔好迫我......"
然後就"砰~砰~", 開左兩槍.

睇完之後, 我有一個好奇怪既疑問.

唔知係唔係警察叔叔係電視見得喬寶寶多.
點解佢唔係對果位南亞裔人仕講:"FREEZE!" 或者 "STOP!"
而係選擇對佢講廣東話架呢 ......?

又, 唔知一支胡椒噴霧有幾大容量.
噴晒成支都無效, 會唔會係過左有效期......?

八婆

2009-03-17T13:37:00.012+08:00

一連兩星期的"星期日檔案"
分別為"港男. 講女"及"港女.講男",

其實, 何謂港女? 何謂港男?

個人認為, 港女/港男同一般女性/男性既分別,
只係在於"溝得到仔/女" 同"溝唔到仔/女".
你睇下溝到仔溝到女, 有正常男女交往既人, 邊有咁多野講丫~

什麼港男港女, 都只不過係因為求之不得而因愛成恨.

有人話: "家下個社會太物質化.
對於某類人來講, 衡量人既價值時只係得返一把尺, 就係錢.
社會又愈來愈少機會俾港男向上爬"

但其實, 香港地一直都係咁, 一直都無變過,
變既只係人既心態.

在八十年代 (或者稱之為"在那美好的八十年代" XDDD)
大學流生四仔主義: 車仔,屋仔,老婆仔,人仔.
四仔主義係好多人既人生目標, 亦唔係咩高尚既情操,
背後都不外乎係一個錢字.

只不過, 過往既四仔, 係自我要求, 家下變左係人家外來要求.
原因可能係因為有自我要求既人越來越少. 肯向上爬既人越來越少.

你話好多人覺得"社會又愈來愈少機會俾佢地向上爬"
我覺得只係"愈來愈少人願意向上爬"

我唔知(亦唔明)點解話社會俾少左機會,
但我一直認為機會係要自己努力爭取既.
更唔明白點解自身不濟要歸咎於人地俾少左機會.

唔知幾時, 好多香港人都由"求諸己"變為"求諸外".

大家口中既港女, 其實有兩款: "有本事港女"及"無本事港女"
"無本事港女", "在那美好的八十年代"係稱之為"八婆"既
對於八婆, 其實由過去到現在, 都係無咩野好講.
只講有本事既港女.

而我覺得有本事既港女係體現到香港精神架噃~
我努力, 我本事, 我可以負擔, 我有要求. 有咩問題?

港女係唔係乞人憎? 都幾架~
如果佢叻過我, 搵得多過我, 食得好過我, 著得好過我.

問題係, 呢個只係對港女既妒忌, 而唔係港女既原罪.

港男就有趣少少,
因為有本事既港男, 並不存在,
能夠有本事, 就已經唔係港男了~
(就好似有本事既港女實在唔應該被稱為港女一樣)

十個有十個港男, 都係無本事既.
而港男既問題, 其實就係源於齋吹唔做.

絕大部份港男對港女既痛恨,
都仍然係停留係: "如果我有錢, 駛要你d 港女?"
呢d "太多如果, 太少行動" 既空想,
再加埋係網上論壇, 幾條麻甩仔再吹多幾下相濡以沫牛依對泣.
得閒無事又搞下網頁開下post 鬧下港女,
猶如怨婦般整天怨數落, 問題就更加嚴重~

基本上, 呢類港男, 雖然有男性生殖器, 實在同八婆無異.

最後, 實在只係"某類人"用錢做尺.
仍然有好多唔係有錢人都可以結婚生仔幸福家庭.

物以類聚, 人以群分,
你係港男, 自然識港女. 無計.

[近日忙於溫書(及打機~:p), 幾篇網誌開左頭都未有埋尾.
反而許久沒有在論壇發文的我,
因為兩集港男港女引起論壇熱話,
見網友大加議論, 又忍不住參一腳.
午飯前短短十分鐘就打左幾百字,
唔好浪費, 稍稍加以修改, 轉記之, 充充數.]

騰雞

2009-03-04T08:34:00.007+08:00

上星期, 回港大圖書館還書.
路經興漢道入口, 原來"騰雞花"已盛放.

心算一下, 發覺時候好像有點不對.

以前港大的考係四月初,
當三月杜鵑花盛開時，意味考試就快開始.
那時方才醒覺原來整年不事生產,
終年吃喝玩樂書少讀, 心裡開始惶恐發毛.
於是學生就將杜鵑花改名為"騰雞花".

由於因為氣候轉變,
原本春暖才花開, 現在十一月已經開花了.
一, 二月的"騰雞花", 已經開得好燦爛.

如果真係跟據花開時間就開始騰雞,
即係一月就開始準備四月考試, 咪有排讀?

其實, 真係有咁乖仔, 一月就開始識得"騰雞"的話,
基本上考試都無需要擔心了...... 仲駛乜騰呢......

老麥

2009-02-23T08:52:00.001+08:00

我一直認為,
麥當奴是最能夠代表平價快餐的食店.

陪我長大既老麥,
基本上係同廉價和無品味畫上左等號.
不過雖然話無品味, 但我幾鐘意食.
原因好簡單: 平! 快! 飽!

總之不想花太多錢又想吃飽, 就去老麥.
幾塊錢一個飽, 十幾塊一個餐,
麪飽和薯條, 全是碳水化合物,
加埋杯大可樂, 應該幾飽.
真係唔飽既, 加多個蘋果批~ 一定飽!
加埋都唔駛廿蚊.

當然, "加埋唔駛廿蚊"呢個概念,
絕對係個人腦海中多年前的殘存記憶.
自從有八達通之後, 買完野嘟一嘟就走得.
我係名付其實既唔知米貴.

老麥亦係我外遊時比較各地物價的指標.
同一個餐, 香港賣十五元, 英國賣五十元, 瑞士近百元.
如此就大概知道兩地消費物價同生活水平的差距.
亦是那時開始根深蒂固地認為,
香港老麥真係廉價填肚食物.

偶爾放工後晚飯前覺肚餓, 想食少少野,
而因為屋企附近的商場又無魚蛋燒賣.
總會去老麥買個飽.

魚蛋燒賣一串要五蚊,
唔覺意食兩串就十元~
而去美心餅店, 無叉燒的叉燒飽都要六元.
當時老麥雙層芝士孖寶,
有兩塊芝士兩塊牛肉, 只售八元.
平過食兩串魚蛋.

不過, 近年老麥不斷加價,
八元一個的雙層芝士孖寶好快就消失左.
除左漢堡飽同埋芝士漢堡飽以外,
其他既飽類一率十元起碼, 一個餐就要廿幾蚊,
加多少少可以正正經經係大家樂大快活食個飯.

最近某日放工, 又見肚餓. 於是又去老麥.
望望個餐牌. 嘩!!! 原來雙層芝士孖寶要十幾蚊~
芝士漢堡飽都要 $7.6......
無奈又真係想食, 於是就買左個芝堡.

但, 當我一拎個飽上手時, 已覺得唔對路.
成本問題, 件漢堡牛肉薄少少我都唔怪佢,
但連塊飽都薄成咁就真係第一次見.

我研究過, 塊麫飽並唔係俾人襟扁既,
而係真係原生咁薄,
我估只有平時一片方飽既一半厚度......
食完, 好似完全無事發生過一樣.

家下既唔平又唔飽,
老麥既特色, 就只剩低無品味.

失守

2009-02-22T03:50:00.007+08:00

其實呢, 我都忍左成年幾,
因為我是一個非常"爛玩"的人.
自已知自已事, 一直都唔敢買.

Forza Motorsport 2? 唔買!
Ace Combat? 唔買!
Gear of War? 唔買!
Call of Duty? 都唔買!

但...佢出Street Fighter 4 喎!
仲有下個月既 Biohazard 5 喎...

為左玩得安心, 要快D 溫完D書先...

唔...黑暗的日子要來了......

奶茶

2009-02-18T09:27:00.004+08:00

近日發現,
這間連鎖小店的紅豆布丁凍奶茶頗好喝.
每次經過都會要一杯. 大概十五塊,
比星巴克便宜一半有多.

小店的卡通公仔很有趣.
"每天開心笑", 見到又真係會笑一笑~

最重要的是: 除星期六日以外,
平日有學生証, 可免費變大杯裝~

呵~ 做學生, 真好~

落後

2009-02-17T09:14:00.006+08:00

上年十二月, 第一個學期考試完結,
工作上吃緊的工程也暫告一段落,
精神上也夠勞累的.
在聖誕新年接連的兩個長假,
也就狠狠的休息一下.

然而鬆懈以後, 一時間也提不起勁來.
已經二月了, 公事私務各方面也未全力起動.

而放在面前的, 是四月的一關.

就像上學期一樣, 如無意外,
公事的死期和考試的日子,
應該又再重叠, 好事多磨, 著實惱人.
尤其是本學期課程已差不多過了一半,
再不趕上, 恐怕覆水難收.

於是決定用"死亡力量"推動"黃金引擎'.
返工就努力做, 務求有貨交之餘又能準時收工.
一放工就回家溫書做筆記, 飯後躲在被窩裡溫書.
其他什麼也都不理, 努力地追大落後.

我其實很喜歡這種要麼不幹,
要幹就咬一咬牙, 狠狠地幹到底的感覺.

經過一個多星期的努力,
雖然未能完全趕上, 卻似乎已經重上正軌.

日間利用工作忘記讀書壓力,
夜晚投入讀書逃避工作煩惱.
能投入地做某一件事情,
其實也是一種享受, 也是一種減壓方法.

盤點

2009-02-16T00:23:00.001+08:00

是日盤點.

買下買下, 不經不覺間防潮櫃已經爆滿.
好多相機都被不洽當地安置於屋內四週.
睇黎要買多一個防潮櫃......

唔知幾時開始, 攝影成為左我既興趣.
除左高達模型之外,
攝影器材係我收集最多的玩具,
亦係我絕大部份零用錢的終極歸宿.

影相好玩之處, 除左按下快門時的即時快感外.
事後更可以回味, 亦可以與人分享.
既可以獨樂 - 例如一個人去影風景街拍
又可以眾樂 - 同另一半或親朋戚友影相, 或者約埋幾友去外影~
拍攝者和被拍攝者都開心.

係數碼既年代, 攝影的入門成本也很低.
由於不用沖曬就能看到成果,
只要有一部數碼相機在手. 在往後的日子,
幾乎可以不用花錢, 就能享受攝影的樂趣
(假設你能忍得住不去換更高階的器材的話.)

另外, 個人認為,
攝影呢樣興趣, 絕對係可以防止老公包二奶.
因為器材都已花掉大部份閒錢, 應該無錢去"沙沙滾".
而老公心思思上EBAY 買相機鏡頭,
總好過心思思上大陸丫~ 對嗎?

更何況, 某些優質器材鏡頭還可以保值.
比起匯豐或雷曼更信得過.

只要老公男友唔係 CHEAP 到係旺角街邊,
用相機鏡頭圍住PROMOTION GIRL 來視姦的話.
另一半以攝影作為興趣,
小姐們太太們實在應該大力支持~

有機會都學人講下手中器材.

攝影萬歲~

================================

DSLR:
Canon 1D Mark II N
Pentax K100D

EF Lenses:
Canon EF 70-200mm f/4 L USM
Canon EF 100mm f/2.8 Marco USM
Canon EF 17-40mm f/4 L USM
Canon EF 50mm f/1.4 usm
MC RUBINAR 4.5/300 macro
Canon SpeedLite 550EX

Pentax Lenses:
Pentax 50-200mm f/4-f/5.6 ED SMC DA
Pentax 18-55mm f/3.5-F5.6 AL SMC DA
================================

DC:
Ricoh GRD II
================================

P&S:
Ricoh R1
Holga 120
================================

Range Finder:
Leica M6 Classic
Leica M8
Voigtlander COLOR-SKOPAR 21mm F4
Leica 35mm f/2 Summicron
Leica 35mm f/1.4 Summilux asph
Leica 50mm f/2 Summicron
Konica 60mm f/1.2
================================

TLR:
Lubitel 166
Lubitel 166B
海鷗 4B
================================

Tripod:
Gitzo 1127 + Velbon PH-273QL
Benro A-350 Ex + Benro BH-0
================================

Polaroid:
Polaroid SX-70
Holga 120 Polaroid
Polaroid One600 Panna
Polaroid One600 Rossa
Polaroid One600 Nero
================================

自侮

2009-02-07T09:21:00.010+08:00

我應該算是一個EQ頗高的人.
平素絕少對人發脾氣.
工作上因"技術性需要"而要罵人,
也只是作狀的一句起兩句止, 很少動真火.
尤其是對一眾則師, 總會多幾分尊重.
客客氣氣的留幾分情面.

本是同根生, 相煎何太急?

然而俗語有云: 無聲狗咬死人.
平素和氣的人, 一動起真火來, 就不是說笑的.

前幾日, 我罕有地對一個則師, 發了一次很大的脾氣.

在電話中, 那位媽媽輩的仁姐,
被我用非常強硬/嚴重/不客氣的措詞,
狠狠地罵了一小時.

原因是她嘗試用了一個非常不專業的行為,
去解決一個非常重要的專業問題.

她將一張很草很草很草的草圖,
電郵到屋宇署供有關官員參考,
並希望該草圖中的建議能令官員滿意,
從而令整份圖則獲得批準.

而那張草圖, 是我在中午十二時,
專誠到她公司幫助解決問題時,
為了幫助自己思考隨手畫畫的.
問題解決了之後, 正想隨手丟掉, 卻被則師取去了.

那時候, 我完全沒有想像過那張圖是會出街見人的.

當我見到那個電郵後, 即時致電問責.
對方的辯解是: 時間趕迫, 對方看得明白, 對方不介意.

聽完後即時怒火中燒.

我不能想像, 一個多年經驗的則師.
居然會容許一張如此粗疏的公仔紙,
作為解決重大課題的官方憑據.

我不能容忍一間所謂大則樓,
對於一件業主親自上陣, 表明需要高度關注的事件,
可以由下午十二時至傍晚六時當中六個小時內, 完全無人跟進,
只在當狗急跳牆時胡亂把些不及格的東西亂發.

作為專業中的一員, 我不能容忍如此非專業的行為.

做設計的人, 應該對自己有要求, 才會有好設計.
好歹也應知道什麼是可以見人的水平.
我學師的年代, 絕不會也不敢把如此粗疏的公仔紙拎出來見人.
就算是拿給自己上司看, 也一定會整整齊齊的重畫一次.
那是對自己的要求, 亦是對自己和別人的尊重.

當時, 我用兩個字形容她的所作所為: 苟且!

那天晚上, 我強烈地表達我的憤怒, 失望, 不滿.
因為我知道像她的人, 在行內不是少數.
就是這些人, 令建築師們蒙羞!

建築師在香港, 本已不是一個得到太大尊重的專業.
然而很多事情, 是互為因果的.
口裡說人家不尊重你, 自己又可有值得人尊重的地方?
自我水平不提高, 還每況愈下, 有什麼好說的?

人必自侮而後人侮之啊!

感冒

2009-02-02T09:35:00.005+08:00

個人賤骨頭, 一放假就病.

初三開始唔舒服, 一直至今.
只係口慶鼻慶, 流下鼻水, 喉嚨痛下,
個人又唔係真係唔郁得, 總之唔舒服, 很討厭.

以前, 感冒都是小事.
食下必利痛, 或者唔理佢幾日,
飲下水訓下自然就會好.

但現在的感冒菌利害多了.
如果有早期病徵時, 不早早打壓.
一但染上了, 唔食藥, 基本上係唔會好既.

必利痛近年己少食.
一覺有感冒, 就會沖一杯檸檬熱飲.
暖暖的又好味~ 多數見效.
家裡和公司, 都總會放一盒.

走到街上, 見到好多人拎住渣打馬拉松的禮品包.
記得去年我也是在同一時間感冒, 病足一星期.
因此缺席了十公里賽事.

原來流感高峰期, 是真的~

初七

2009-02-01T00:00:00.006+08:00

初七---人日
HEA足全日---對住盆桔
個人---唔知做乜

初七---人日
人人生日---我卻抑鬱
好似---有D心UP

初七---人日
坐唔安樂---訓又唔得
因為---我怕聽日

初八---好日
假又放晒---無得消失
明早---開工大吉......

門鎖

2009-01-23T13:39:00.013+08:00

聖經說: 不義之財, 必然消耗.
阿媽話: 冤枉來, 瘟疫去.

一些突然多出來的非經常性收入, 多數袋不穩.
這是一個多年來得出的經驗. 是為一劫.

所以, 打從出左花紅當日起,
為左應一應個劫數, 總想買些玩具俾自己.
可惜左睇右睇, 總不合心意.
結果手腳太慢, 在數難逃,
太太手機意外壞掉了. 應了劫數.

原以為此劫已了,
誰知昨天晚上放學回家時,
大門門鎖居然忽然壞掉了!

昨晚午夜回家, 我如常開門,
鎖匙插入匙孔內給扭到可以開門的位置時,
本應不能再轉動, 可是它居然仍能繼續扭動!
在不為意的情況下, 把鎖匙扭得過了位.
結果門開不了, 鎖匙也抽不了出來!

幸好太太比我早返家, 當時門鎖並未出事,
因此可從室內為我開門. 也能把鎖匙拔出.
如果屋內無人, 則要請人上門開門爆鎖.

門鎖絕對不是脆弱易壞的東西.
苦思良久亦不明白何以忽然壞掉.
除了是個劫數之外, 我也不明白何以解釋.

年近歲晚門鎖壞掉, 難道又要破財, 應埋劫先過年?

想到又要花錢, 雖然心有不甘.
可是我這個人比較懶惰,
錢能解決的就不是問題, 也懶得去煩.
反正只要開門時小心一點, 仍然可出入,
只要明天找個空檔開個小差,
請個鎖匠回家搞搞就可以了.
何況回家時已是午夜, 天大事情也明天再算.

然而太太卻跟我不一樣, 她整晚也擔心得不得了,
弄得我也心煩起來, 迫不得已要即時認真想想解決方案.

一個門鎖, 基本上是由鎖膽同門閂組成,
好地地的沒人強行爆破, 其實可以壞的地方不多.
門能關上鎖好, 即是門閂沒有問題.
大概是鎖膽部份出事了.
可以明早去買個鎖膽換上.

今天早上大清早起來, 又諗起個門鎖,
想來想去, 總認為鎖膽本身應該沒有問題.
一直相安無事忽然壞掉,
可能只是某部份磨蝕了, 或是安裝上出了差錯.

雖然鎖膽一個只係三百多塊,
但如果只是安裝問題, 可能連鎖膽都無需要換.
況且如果此等家居小毛病都處理不了,
而要老婆惶惶不可終日.
我常在老婆面前自誇那些什麼"巧手小工匠", "魔島小王子" 等名號,
還可往哪裡掛?

為名為錢為啖氣.
把心一橫, 大清早起身自己修理門鎖.

拿出工具, 把鎖頭拆掉.
再用手指伸入鎖內, 了解一下內部組合結構.
左搞右搞, 裝裝拆拆, 調節修正......

結果, 花了三十分鐘研究, 免了一劫~
慳番三百塊可以買玩具.

我仍是 "巧手小工匠" 和 "魔島小王子"

一歲

2009-01-19T11:45:00.009+08:00

今天小珠美一歲了~~

小孩子大得真快.
轉眼間, 小珠美已由原本像一舊飯團似的,
變得懂得和別人有意識地溝通.
而懂得做反應的小朋友是非常好玩的.

最令我開心的, 是這個小姪女似乎很喜歡我~
常常眼定定的望著我, 我往那裡她就望那裡.
這令伯娘非常妒忌,
說是因為我有家族遺傳的大眼睛.
也長得和她爸爸相似,
所以小珠認得我, 也和我較親近.

可是我卻認為是因為我們都是水瓶座~
大家都有高度的心靈感應, 直覺親近.
也可能因為她知道這個大伯都是小朋友,
是一個很好的玩伴.

有時我會想, 和她對望著的時候,
在她那小小的腦袋中, 應該正描畫著我的形像.
小朋友眼中的世界就是不一樣,
在她的眼中, 也許我是一個怪人:
是一個很巨大的生物, 大部份時間整個人都是黑色的.
常常向她擠眉弄眼, 逗她笑, 陪她玩, 也愛抱她.
而且整天拿著一大舊黑漆漆的東西對著她.

"對了~ 總之拿著大相機小相機追著我來拍的傻瓜就是大伯了!"

小珠美你要記得我啊~ 我是很疼鍚你的大伯啊~

見到小朋友聰明又健康地成長,
是一件令人很開心愉快的事.

失憶

2009-01-15T10:35:00.009+08:00

近日經常出現短暫性突然失憶.
而且越來越嚴重.

例如: 明明想去搵文件,
行到去老闆房門口既文件櫃,
忽然會諗: 我黎係想做咩架呢?
搵老闆? 搵秘書? 定搵文件?
搵文件的話, 又想搵咩野文件?

又例如: 有時做做下野,
忽然醒起要打電話覆某某人,
於是開電子郵箱搵電郵及電話,
開左郵箱之後, 又見到某更需要回覆的電郵.
於是又搞一輪, 再望一望枱頭電話:
咦? 我係唔係要打電話? 我要打俾邊位呢?

更嚴重既情況係:
同人講講下電話, 忽然整個人當機!
完全既失憶, 唔記得甚至唔知想講咩.
要個腦要停一停, 諗一諗, 然後先可以繼續.

用IT人既術語, 呢種情況,
乃是因為其記憶體(Ram)空間不足以處理系統硬體所發出的呼叫.
本身亦有太多記憶體常駐程式(TSR),
加上在"多工作業"(Multi-tasking)的情況下,
同時間開啟太多不同既軟件, 導致記憶體超出負荷,
暫存記憶體未能及時作出快速存取.
從而引至"堆疊溢位錯誤"(Stack overflow).

從技術支援服務中得知,
更正這個問題的可能方法如下:

1.取消記憶體常駐程式 (好難, 唔知最消讀書好定工作好...)
2.取消硬體衝突 (手腦口不協調, 又係唔知取消邊樣好...)
3.變更 Config.sys 檔案中的 "STACKS=" 行
例如: STACKS=64,512 FILES=60 BUFFERS=40,
甚至將 FILES 數值設定為更少.

簡單黎講, 即係我應該放下假......

派信

2009-01-13T16:35:00.013+08:00

年度第二張成績表派發, 成績合乎預期.
無奈限於時勢, 無人工加, 非戰之罪. 也就罷了.

雖然去年公司總收入應該不比前年差.
但在金融海嘯各界紛紛大叫要裁員減薪的情況下.
如果我係老闆, 就算去年有錢賺,
俾著我都一定借勢減番多少.

因為幸福同 bonus 都並不是必然的.

所以呢, 在風高浪急的情況下,
能夠站穩, 同時又達到自己目標, 已經相當不錯.

縱觀各種因素, 我相信這張成績表其實是算好的.
但同第一張成績表一樣, 情緒沒有太大波動.
無唔開心, 但亦唔會特別開心.

可能我無經歷過去年的大豐收,
而且對於整體狀況心中有底, 所以無太大衝擊.

能夠"不以物喜, 不以已悲", 也很好.

相反, 我老闆似乎受到很大打擊.

每年一度的派信日, 例必親手頒發順便訓示幾句,
可是今年例行儀式卻被取消,
罕有地改由秘書派代為派信.

我等一眾八掛同事, 見勢色不對,
趁老闆離開辦公室, 即時聚在老闆房門外向秘書收風.

據秘書所講, 老闆收到信後相當失望而慣怒.
口中唸唸有詞, 繼而相約一眾好友吹水消氣去.

大概他連自己都無法安慰, 所以更加無法安慰我們.

我們研討得正熱烈之際, 忽然老闆回來!

他是大情大性之人, 心直口快,
我們相距十步之遙, 彼此一個照面,
他已急不及待的在辦公室走廊中大聲預警:
"嗱~ 你地唔好俾面色我睇呀~ 唔關我事架~"

即時雞飛狗走~

懺悔

2009-01-12T09:43:00.003+08:00

上星期某日, 大學師妹來電找我做訪問.

大學畢業幾近十年, 仲有人識得我?

原來他們是建築學生會的現任幹事.
而今年是建築學生會成立二十週年,
他們希望出本小書, 講述一下廿年來學生會的演變.
所以希望訪問一下學生會的前會長.

既然已塵封的記憶也被抖出來.
基於虛榮, 欣然赴會~

見面是在油麻地一間樓上咖啡店.
七時到達, 包廂內已有七位現位學生會幹事.

第一眼的印象, 就是一群很可愛的很年青小朋友.
他們都是未見過茂叔順嫂陳積彬仔的一群.

我很喜歡和後輩傾談, 因為可以令自已感覺年輕.
偶爾又可持老賣老, 過過大師兄癮也很爽.

我相信知識和經驗是需要一代一代傳承的.
尤其是幹我們這一行的, 傳統以來都是師徒制.
有責任把經驗和心得傳下去, 讓後來者行少點錯路.

後來加入的另一位前會長, 是我的大師兄,
即是小朋友們的大大師兄.
他四年級快要畢業時, 我才是一年班.

兩個大男人在小包廂內, 跟一眾小友大談當年:
由上莊到功課, 由讀書同人事, 由理想到現實.

似乎兩人都很希望在有限的時間內,
將自已所知所學所見, 有關建築的一切,
全都傳給小師弟小師妹們. 很有點閉門傳功的味道.

大概我倆在建築路上都寂寞.

小朋友說的不多, 許多時都是我們兩個在自說自話,
我們都是多言的人, 由七點至十二點, 一路的說著說著,
說得漸漸忘我, 本來只談學生會的, 漸漸的越說越遠......

我和大師兄在現實的工作上, 是處於兩個對立面的.
他是一個執業建築師, 一所小則樓的老闆.
而我呢, 是本地大發展商的一個小小的項目經理.

如果大師兄是代表最終能實踐建築理想的光明建築師,
那我就是代表為發展商欺壓同門為虎作倀的暗黑建築師.

極端一點來說, 我是背叛了同門.
雖然我常欺騙自己, 說我是深入虎穴,
希望有朝一日能從根本處改變.

大師兄訴說現實中建築師工作的苦與樂.
而我呢, 我沒什麼可以說的.

我日常所做的偷呃拐騙技倆,
其實也需要很高的技巧.
但對於仍有理想的小朋友來說,
只會教壞他們吧.

儘管小友們已聽得有點發呆,
我仍是慢慢地一項一項的說著,
告訴他們我做的什麼是錯,
更重要的是: 如何可以做得對.

我面對著他們, 彷彿是面對著向年輕的我,
在告解, 在懺悔.

我知道他們不明白我所說的, 像我十年前一樣.

終有一天, 他們會明白的.

陣痛

2009-01-06T10:04:00.005+08:00

歡樂的時光過得特別快.

新年後的某日, 上網時手痕登入學校網頁.
噢... 新的課程綱要及閱讀材料已經更新.
新的學期又要開始.

即時收拾三魂喚回七魄, 元神歸位!

望一望閱讀材料, 媽的!
又是令人沮喪的過百頁. 只有三日時間準備.
究竟有無考慮過兼讀生是要上班的呢?
唔返工都無咩可能睇得晒.

沒辦法, 唯有同自己講: 起初總會有陣痛.
咬一咬牙又開始.

又要放下相機幾個月了...

觀日

2009-01-05T10:00:00.014+08:00

08年秋, 曾經拉大隊到大帽山影日出,
可惜天不造美, 殺羽而回.

那時曾計劃過於 09年元旦再上山,
看新年第一個日出.

然而聖誕過後看過天氣預報,
09年一月一日前後都是預測有雲或微雨.
似乎能成功見到太陽伯伯的機會微乎其微.
那時, 已決定把那個元旦觀日節目忘掉.

不過我想忘記, 太太卻忘不了.

元旦前幾天, 太太說:
"一月一日我們去拍日出吧. "

當時, 我不明白何以太太如此有信心.
作為一個觀星及天文愛好者.
以手上資料及過往經驗,
我認為一月一日可以成功睇到日出的機會,
是少於百分之五十.

不過, 既然她想去, 我也沒所謂.
到哪裡我也會陪她去.
就是只怕她盛興而來, 敗興而歸.
新年第一天就掃興, 總不大好吧.

三十一日早上, 當時天仍有雲.

太太跑來跟我說:
我已看過天文台網頁數據,
明日凌晨十二時至清晨六時,
天空 xxx 米以下, 雲層將少於 yyy...

有時, 我也很佩服她在資料搜集方面的能耐.
只要她喜歡, 她會用盡一切方法去搜集有關資料.
這種熱血, 連我都有所不及.

既然有數據支持, 也不打話.
約好朋友V, 一月一日凌晨四時出發上山.

當晚除了攝影器材外, 還有全身的禦寒衣物:
有冷帽, 長袖汗衣, 樽領毛衣, 抓毛外套, 防風風褸...
我敢說那是我三十多年以來, 穿得最多最厚的一次.
因為當時室外氣溫只有約十三度左右,
山上比山下低四至五度, 加上寒風,
估計要在三至五度的寒風中呆上至少一小時,
故此不能不嚴陣以待, 相當認真.

出發時望望天空, 果然如太太所講,
空中少雲且大風, 知道可見日出的機會頗大.

09年一月一日清晨五點,
我們已到達大帽山行車可達的最高點.
那時方才發現, 像我們一樣的傻瓜真不少!
小停車場居然已泊滿了車輛.
好不容易才泊好了車, 開始步行上山頂.

由停車處到最佳觀日位置,
需時約四十五分鐘的步程, 不算太長.
途中見滿天繁星, 是久違了的夜空.

清晨六點, 距離日出時間尚有一小時,
我們在觀日位置架起腳架, 開始拍攝.

當日吹清勁東北風, 山上寒風凜烈.
縱然全身包得像隻椶子, 仍然百物一疏.
忘了一對手套. 雙手曝露在外, 凍得麻痺.
勉強能按快門, 手指也不懂得屈曲.
很多時整個人也被吹得站不穩.

然而, 當旭日初升的那一剎那,
我相信一切都是值得的.
眼睛與快門都未曾停過半分.
很難相信, 香港還有如此美麗的景色.

在瑰麗景色之下, 雖然很冷麻木了,
仍不忘將太太一擁入懷, 親了一下~

在朝陽下的新年第一個擁吻啊~
感覺浪漫而幸福. (羨慕吧~ XD)

新年有一個幸運的好開始, 零九年應該會好的.

一年

2008-12-31T23:34:00.001+08:00

仲有半小時又過一年. 時間過得真快.

回想一下, 本年度個人的重大事件,
多是發生在本年初第一季:
一月時多了個可愛小侄女,
三月時被取錄了重回校園.

讀書算是本年度個人唯一的大動作.
其他的都沒什麼大不了. 平平淡淡安安穩穩的.

也無風雨也無晴.

打從上年年底轉職後開始,
我認定08年是主守的一年.
如果從這個角度來看,
今年算是頗為成功完滿的一年.

個人兩大年度成績表已發放了一張.
無唔開心, 但亦唔值得開心.
個人認為絕對可以再好. 要多加努力.

另一張成績表則於下年年初見人.
經過一整年的搏命,
我好有信心, 應該會有我要求的成果.
希望年初有個好開始.

各方面站穩腳, 零九年,
要更努力爭取好成績.

希望自已快樂, 亦能令我愛及愛我的人幸福.

謹誠祝願~

下雨

2008-12-30T09:22:00.002+08:00

考完第一科的那夜,
因為表現不滿意, 我呆了一整個晚上.

雖然自己不滿意, 不一定等如考得不好,
但很多時候他們是等同的.

考得不好是客觀的, 考得不滿意卻很主觀.
考得不好就是低分. 考得不滿意係唔夠好.

在回家的路上, 不斷鞭撻自己:
為什麼不冷靜一些? 為什麼不這麼這麼答?
為什麼不加上這一個論點?
為什麼浪費那麼多時間寫廢話?

腦中不斷自我批判高度反省.
考完試獨自吃飯時, 是呆呆的.
由香港站到青衣站, 整個人都是呆呆的.
回到家, 坐在客廳對住電腦, 也是呆呆的.

我係一個唔會放過自已既人.

如果我只係有能力拎四十分,
我絕對唔唔介意唔合格拎四十分.
但如果我有能力拎八十分,
就算只拎七十五分我都會唔滿意.
做唔到要求, 就會拎自己出來鞭屍.
直至下次做到為止.

叫做自我要求高又得, 叫做要強好勝亦可.
我不能接受自己做得不完美, 不能接受自己苟且.
這種性格, 由中學至今, 一直無變過.

雖然這種異常頑固的執著,
令自己常處於壓力與不快之下.
但這種偏執, 卻是我樂於接受的.

今天早上起來, 天氣寒冷,
窗外原來下著冷雨.

下雨?!

猛然醒起! 原來今天出結果......

智慧

2008-12-29T10:04:00.005+08:00

我常覺得, 雖然我倆都係小朋友心性.
但我太太其實係好有智慧既.

因為公私兩忙, 近幾個月都好少出街逛.
聖誕節假期有空就出去shopping 一下,
見有好多好有趣既小玩意/小裝飾/消費品.
好多時候都覺得好玩有趣,
好似小朋友一樣, 一見到就好想買好想買~

而係呢個時候, 我聽得最多我老婆講既說話就係:
"呢樣野放係呢度就好玩/有型, 買番屋企一放就唔好玩/老土架喇."

通常, 係離開左案發現場之後, 再望番轉頭.
咦~ 又係噃~ 都唔係咁好玩之嘛, 無乜用, 又都幾老土喎.

呢招, 唔單止可以用黎打沉我,
亦適合用黎自我打沉.
年終可以減少好多 impulse buying.

愛恨

2008-12-23T09:03:00.016+08:00

腦中常載一堆不解的疑問.
閒時拿出來胡思亂想一番.
其中一個, 是有關愛與恨的問題.

自家與身邊不乏一大堆老夫老妻,
年紀一大把, 兒孫一大群. 卻經常爭吵.
反目有之, 互相視之為仇人有之,
同住一屋, 也可幾近老死不相往還.
因為一開口就會開拖~
絕對唔係耍耍花槍之類既情趣玩意咁簡單.
當為獨有溝通方法也不行,
因為根本不完成基本溝通目的.

如非技術性障礙以及成本效益問題,
大概一早離婚了吧.

恩愛到老的也不是沒有, 但相對的算是少數.
雖說無仇不成父子, 無怨不成夫妻.
何以怨如此深? 此為一大不解之謎.

說到底, 幾十年前的某個花前月下,
總有過溫馨綺麗相親相愛山盟海誓的時刻吧.

我常常想, 就算在某一段豬油朦了心的時刻也好,
在那一段失落了的時光, 應該好歹也曾真心相愛過.
何以幾十年後, 好像徹底被忘掉, 只剩怨恨.

大部份人的情感記憶系統很奇怪,
問問自己最快樂的事, 很多時記不起.
但問到令自己最不快的事, 卻刻骨銘心.
恨意可以累積, 快樂卻不能儲起.

然而, 何以由愛變恨, 甚至極恨?
出事者眾, 可有什麼共通原因?
又或者有什麼轉捩點?
多年來思之甚詳, 卻不得要領.
一來人人情況不同, 也不一定理得出個頭緒來.
二來未到如此階段, 想了也是白想.

昨天, 和朋友B 午餐小聚.

我們這個年紀, 兩個大男人坐埋,
不是講事業, 就是說兒女.彼此相識廿載,
此獠居然欺騙老友背信棄義唔嫁又嫁,
年初偷偷地添了個小寶寶.
一歲未滿, 新爸爸似乎剛過了適應期.
忙個不亦樂乎, 痛苦地快樂著.
而爸爸和非爸爸之間,
生仔與否算是熱門討論話題.

"其實, 生唔生, 夫妻間既感情基礎很重要."
此獠口吐人言, 忽然感嘆, 令我甚為意外.

"有什麼問題嗎?" 我問.
由追求拍拖到結婚生仔,
我全程目擊此人的感情生活.
他倆都是沒所謂的人, 夫妻關係挺不錯.

"整體上很難說得上個大概, 總之都是瑣瑣碎碎,
許多小問題, 如果只是兩人之間則容易彼此遷就,
但一關係到另一個生命, 問題就容易放大了. "

朋友B 扒左兩啖飯, 又開始感嘆道:
"正如兩個好朋友不一定是好的合作伙伴一樣,
生兒育女是一個兩人一生共同的大project.
甚至是拍拖後唯一一個認真地共同合作既機會.
很多二人處事態度上的分歧,
要經過共同合作, 才會慢慢浮現.
沒有良好的感情基礎同共識,
兒女可能就是夫妻感情裂痕的開始."

聽完想了一會, 有點怏怏的.
心中的那個疑問, 卻多了一個可能的答案.

收爐

2008-12-22T10:08:00.000+08:00

年近歲晚, 踏入十二月,
精神上已經開始收慢火, 準備收爐.

返到公司, 因為唔想做野,
所以會以極速清走晒手頭上所有既事情.
務求令自己最少有半天係可以坐係度唔駛做.

"因為想偷懶所以積極做事"既工作態度,
個人認為係非常值得鼓勵既.

本年度餘下係公司既日子,
主要係思考一下下年既工作安排.

希望各同事, 顧問團隊, 以及老細,
唔好打擾我入定冥想就好......

病假

2008-12-20T10:25:00.001+08:00

壓力過後, 往往身心一放鬆就會病.

上個週末, 當各方壓力完結後,
跟友人往澳門遊玩狂食一天,
結果第二天就病倒了.

全身乏力, 喉嚨痛得像火燒.

咁既情況, 好應該唔好返工,
睇完醫生就放返一日病假.

然而, 人的心理是很奇怪的.
精精神神時, 會因為懶惰,
而去混張醫生紙, 放個"精神病假"--
明明好"精神", 都去請"病假".

而當真正生病時, 就會忽然變得有責任感,
會覺得去排隊輪候睇醫生拎醫生紙很麻煩.
又會覺得"好似好多"公務纏身,
左計右計都不能放假,
拼死都要爬返去公司以示忠誠.

而以上種種問題, 在"精神病假"時,
完全不會認為是問題來.

結果, 週一抱病仍然爬返公司.
老闆又不在, 工作問題未解決,
有野要做但做唔到, 連相都影唔到一張.
(唔係真係影相, 而係俾老闆望到你係好辛苦地做緊野.)

週二, 病得更辛苦了,
但因為之前老闆講左要一齊落地盤,
而昨日要解決的事要今天解決,
於是又唔放病假, 再次爬番公司.

返到公司, 九點未到, 小秘書過來話我知:
為慶祝昨日拎到入伙紙, 是日老闆決定即興放假一天~

天啊!!! 又話一齊落地盤既??!!

結果, 當然唔落地盤吸塵.
因為被騙, 全日罷工.
一條友坐左係公司, 打左好多篇 Blog.

如此拖拖拉拉, 結果都係無放病假......
最終都只係週三下午用左15分鐘去睇醫生.
無任何得著, 辛苦既都只係自已.

筆試

2008-12-18T09:24:00.001+08:00

幼稚園: 3年
小學: 6年
中學: 7年
學士: 3年
碩士: 2年
合共: 21年

無聊數一數, 原來, 由幼稚園到大學,
加加埋埋我已經讀左廿一年書!

亦即係話, 直至現時為止,
我人生中有2/3 既時間係讀緊書既.
只有初生時既三年, 以及過去工作中既十年,
我係並未有上堂.

只不過, 無上堂並唔等如唔需要考試.
係過去十年, 當中有三年就參加左三次專業試.
加埋之前無數咁多場既測驗考試,
算係長年生活係考試當中. 亦習慣了考試.

其實, 我係幾喜歡考試.

因為通過考試, 往往係代表你完成左一個階段.
考試係定期既, 你清楚幾時開始, 幾時完結.
結果亦非常明確. 好清楚自己係一群人中既排位.

試問課堂外既生活, 可有如此清淅明確既指標?

而作為一個土產人型考試機器.
我以為我對考試早已習以為常.
直至最近, 我才發現, 原來考試是頗為辛苦的事.

主要原因係在於放下十年既筆試技巧, 早已生疏.
亦發現原來當年會考及高考, 狂操過去試卷,
令答題目變成反射動作, 係有相當大既作用.

係一眾生疏既考試技巧當中, 最大既困難,
係在於"如何在限時之內, 寫出可閱讀既字體"

過去十年, 揮筆疾書既機會少之又少.
更莫講話要寫足兩小時,
用電腦打字打足兩小時就有.
考試題目我唔係唔識, 亦唔係寫唔切.
只唔可以寫得切又同時令人睇得到咁解.

另一個問題係, 小弟手字不但醜,
而且基於工作習慣,
我只能流暢地手寫全大階的英文......
令可讀性再進一步下降.

結果, 係整個筆試既過程,
我係不斷留意自已字體既可讀性.
只要一開始放肆, 就即時收緊.
此舉比起答問題本身更累人.

為左彌補字體上既缺憾, 我只有將字體放大.
再將每一行既字數減少至五至八個字.
加埋隔行答題. 外加分段標題, 好似好勁咁.
務求令到改卷果位唔好改到流眼水.

結果, 因為又隔行又少字.
有一科考試未到一半時間就舉手拎多本答題簿.
足足寫左一本半有多. 唔知就嚇死, 知就笑死.

其實, 家下絕大部份既專上學生都識用電腦.
點解唔用電腦考試呢? 對改卷員同對考生都有好處嘛.

筷子

2008-12-16T23:50:00.008+08:00

讀朋友女兒的網誌,
談到有關小朋友學用筷子.

看見那雙相當有系統且科學化的"學習筷子",
就想起小時候學用筷子既經歷.

家母一直認為,
一個人一定要能把筷子要拿得正宗, 才有"衣食".
故此, 她非常留意別人懂不懂拿筷子.
例如去宴會時, 她會視察同枱各人是否能把筷子拿得好.
然後在宴會後作出"賽後檢討".

她不但在現實生活中留意, 甚至在看電視或睇戲時,
只要有開枱食飯既場面, 她都會注意人家用筷子的手勢.
以前每逢"香港八_" 一開枱食飯, 她就會開始批評:
"你睇阿邊個邊個用筷子用得幾肉酸!"
"嗱~ 阿邊個邊個就用得靚喇~"

這個對於"拿筷子正確手法"近乎病態的注視同執著.
令佢覺得一定教好下一代正確地用好筷子.
所謂"正確", 是包括姿勢, 手法及靈活度.

我小時候當然沒有"學習筷子",
哪我是怎樣學用筷子的呢?

很簡單, 只用兩樣餸菜就搞定了~
就是叉燒豆角煎蛋, 以及冬菇蒸肉餅.

因為我愛吃蛋和肉餅, 家母為訓練我用筷子,
很多時候都用叉燒和豆角切成小粒用來煎蛋.
又或者用冬菇切成小粒蒸肉餅.

每當吃蛋或肉餅時,
總會有許多許多的豆角粒叉燒粒冬菇粒掉在碟上.
家母就要我用筷子,
一粒一粒的把那些剩下的粒粒夾起來.
方法要正確, 手勢要正宗.
筷子用得好又夾得到, 就有得食.
若然用得不正確, 她就會用筷子敲打我的手背.
象牙筷子打手背, 都幾痛既.

後來, 當我能把筷子拿得穩妥,
就和家母鬥快用筷子夾粒粒.
就好像"功夫熊貓"中,
肥熊貓要用筷子和師父爭食饅頭一樣.
整個過程, 頗有練功夫的味道.

我就是在如此情況下, 學好用筷子的.

家母還頗懂得因材施教.
要訓練為食的我, 只用吃和罰就可以了.
而對細佬和表弟, 家母則用獎勵法,
拿得好筷子就獎玩具.
就是這樣, 細佬當年在屈臣氏,
買齊了一整套"天威勇士"公仔.

到今天, 我能拿得好一雙筷子, 也頗有"衣食".
全賴當年家母的土法家教.
算是一個頗為引以自豪的家傳小技能.

不過, 現在回想起來,
當年怎麼只要吃不要玩具呢! 死蠢!

演出

2008-12-12T09:20:00.006+08:00

從來拒絕任何外來壓力,
我所有壓力都是自已俾自己.

然而過去三星期, 我想是我做三十多年人以來,
各方面都最大壓力的一段日子.

考試同公事的死期完全重叠. 撞到砰砰聲.
兩者壓力不約而同地同期開始, 同期結束.

由於認定兩者為今年最重要的個人成績表.
兩者意外重叠亦是我久未遇見的重大考驗.
好勝的我給予自己很大的壓力.

雖然我不輕言苦, 認為任何事情都總會捱得過去.
不過, 到了整個過程的最後幾天,
我得坦白地承認, 我是覺得頗為辛苦的.

只是辛苦的同時, 又有點興奮,
畢竟可以令我覺得有壓力又為難的事, 著實不多.
如果不是我喜歡幹的事, 我是不會給壓力自己的.

回想過去三星期, 感覺上真的使盡渾身解數.
把自出娘胎後所學的一切待人處事方法手段全都用上.
有正道有詭道, 有真誠真狡猾, 有努力有運氣.
箇中經歷, 足以成為多篇文章題材. 夠寫一個星期有多.

在現實舞台上傾力演出, 非常吃力, 也非常過癮.

溫習

2008-11-30T23:47:00.003+08:00

週日在家溫習的時候:

窗外的天氣特別好, 陽光份外燦爛,
屋企的垃圾食品特別好吃,
吸塵抹枱打掃變得份外有趣,
上星期的漫畫特別好睇,
重覆的電視格外好看,
無聊的網上論壇特別精彩.

床特別舒服, 人份外渴睡,
課本格外難, 記性特別差.

這是要溫習準備考的星期天.

托大

2008-11-23T22:16:00.009+08:00

一個人食完晚飯, 入CD 店內閒逛.
在新貨架上, 有一隻CD 吸引了我的眼光.

無他, 在大大隻的包裝上, 是一張頗吸引的側面.
整張臉孔佔了八成封面.
而在先進的PhotoShop 技術下, 皮膚顯得頗為完美.
也因此, 只能說是吸引, 說不上是美, 還是不美.

新進女歌手我認得的沒幾個. 這個也很陌生.
封面沒有中文名, 只有英文名字Takki
拿上手翻來複去, 都找不到中文名字, 連姓也沒有.
只知是一隻只有五首歌的細碟.

我以為是我太脫節, 難道是日本知名的歌手?

不服氣, 回到家上網找找,
初時連名字串法也搞亂了, 以為是Tikki, 還是Tikka...

結果? 王若琪小姐, 不是人人都識得你的啊~
作為一個新人, 如此的處女碟包裝,
只有一張尊容, 連名字也不詳, 太托大了一點吧...

不過, 其實手法都算成功的.
看~我不是也在幫她宣傳了嗎~
香港地大概不乏我這種無聊的好事之徒.

可惜的是, 睇個blog既留言, 似乎好多地方都無入貨......

作文

2008-11-10T10:37:00.006+08:00

話說, 自問在寫作上, 無一手都應該有大半手.
從小以來為文不起草, 下筆成章, 出口成文, 一揮而就.

不過, 只限中文.

用英文寫作就大件事.
因為英文底子不甚好, 詞彙貧乏, 句式單調.
只稍稍比起 I am a man, I have a pen 好少少.

我的英文寫作技巧止於中七.
也只屬混得過高考的程度.
而大學時代基本上不需要寫作論文.
總是畫畫畫, 英文書也不多看.
讀書報告也是東抄西改拉雜而成.
文字功夫少, 英文讀寫能力也就只退不進.

過去一個星期, 因為功課關係,
首次要有系統有邏輯地寫一篇長文. 我就知錯了.

二千五百字的一封建議信. 五至六版紙.
不必華麗, 但要有系統, 通順, 邏輯合理.
加上一大堆旁徵博引. 很頭痛.

以前先把有用文字大堆大堆的 copy and paste,
再以 and, then, therefore, however, although 等連接詞連起來.
草草了事, 也沒有人深究. 現在卻完全不同.

第一份功課, 最少大改左五次. 亦即係重寫左五次.
有時覺得方向錯了, 有時覺得邏輯不對, 有時覺得用字不佳.

閒談時對同學說我改了很多次, 本是吐吐苦水.
可是直覺告訴我, 有人覺得我是太認真,
有人覺得我做得快在晒命.
其實, 只是底子太差. 寫來寫去都狗屁不通.

真正做得好寫得好的, 一次就夠.

亦證明, 世上有很多事情,
是打落門牙和血吞, 還是別奢望有人同情.

今個學期, 要認真寫得只有一科. 下個學期卻有三科!

如何了得?

感動

2008-10-23T13:37:00.014+08:00

曾幾何時, 我們都想過用自己的學問去貢獻社會.

後來, 我們發現, 世界很大, 你我的力量很小.
讀過的書很多, 然而只是為謀生而營役.
能得三餐溫飽以外, 卻沒有多大的用處.

有時我甚至覺得,
"學識", 只是用來欺負"不懂"的人.
諗"建築", 卻沒有為社會"建設"過什麼.

我沒有多大既理想,
卻介意自己書讀得多, 卻沒有把世界變得更好.
為此, 我默默地進行了一些傻傻的自我救贖.

今天午飯的時候,
公司郵箱來了一封陌生的電郵.
是一些電子賀卡的邀請.

我以為是垃圾電郵, 還些點兒想把它刪掉.

但, 明明抬頭是寫著我的全名的嘛.
還署名是某某單位業主.

反正是公司的電腦, 中了電腦病毒也沒相干~
既然想不起是誰來, 就click 入去望望...

***

Dear pppmmm,

Your show up in our flat impressed us very much that you are so kind a person... Well educated, a high professional .... but not mind using your precious time to give us your professional advice.

It makes us realized that there are really many good people like you in this society to form out a good culture to help without thinking to much on self-centre.

We take your advice now going to dismantle the fences on the shortwalls at our balcony, but still keep the cover shelter which is good enough not to get an order from Buildings Dept.

Though we don't know each other, we think it is God's grace to let us glanced you.

Have a nice day !!

God bless you.

***

那是幾日之前的事來, 也沒有花多少時間.
臨走之前交換了名片, 所以他們只有我公司電郵.
我已經忘記了. 他們卻仍記得我.

雖然是一件很小很小的事. 卻令我非常感動.

我實踐了一個小小的願望:
用我的學識, 去做對社會, 對人有益的事.

我是貪慕虛榮的,
但比起對個人的讚美, 我更在意這一段:

"你令我們發現到, 原來在這個社會中,
仍有許多好人願意去幫助別人, 而不是人人只顧著自已. "

雖然是很小很小的事,
但我可以正面地令世界有一丁點不同.

那是一種很滿足. 很愉快的感覺.
一種"我做到了!!"的暢快.

感激蘇先生蘇小姐對我的讚賞和鼓勵,
我會堅持這種小小的社會服務.
希望你們生活愉快~

散渙

2008-10-20T13:30:00.003+08:00

經過近兩個月高度集中及專注後.
個人開始散渙. 證明學習最重要係持之以恆.

考試時間表已發放,
最近又有group project搞.
睇黎係 presentation 之前, 都有一輪忙下.

決定請一日假,
檢視, 安排, 疏導並整理一下自己.
希望在假期後, 在學習及工作上,
會有條理有信心一點.

平日工作上的忙碌, 只是因為懶惰,
已經很久很久沒有這種忙得毫無頭緒不知所措的感覺.

嘿~ 好得很!

比較

2008-09-28T23:12:00.009+08:00

其實 Architectural Lawyer 有型d 丫?
還是 Legal Architect 有型d 呢?

開學一個月了, 感覺還可以.
最大既負擔, 只係黎自閱讀.

以往, 我是從不看英文書的.

當年唸建築, 買回來的書,
內容九成是圖畫,
看書多是看相片圖則,
文字只是輔助的, 多數跳過.
印象中, 除了最後一年做論文時,
為了要研究歸納一個建築理論,
因而草草地看完一本小書以外.
好像從未認真地看過一本書.

但在過去的一個月中,
當中所睇"英文字"藉既量,
大概係我平時三年既總和.
而且每本書都絕不欺場,
密密麻麻滿滿的都是字.
就連封面都係無圖畫既.
真係睇到頭暈暈眼花花.
莫講話要明白, 睇得完都偷笑.

不過, 我發現不停看書都有一個好處,
現在每天放工回家, 只要拎起本書,
就好似忽然走左入另一個世界一樣.
可以忘記另一個世界既煩惱.
效果同走去演戲差唔多.

用一種壓力去取代另一種壓力,
唔知係叫減壓, 還是換壓.

另外, 未讀之前, 覺得法律係好清楚肯定既.
白紙黑字嘛~ 仲唔夠肯定?
點知, 越睇得書多, 就越覺得唔肯定.
又或者其實法律本身好肯定,
只係每一個肯定, 都會有十個例外,
每個例外又有三四個唔同既角度...
世事真係無絕對.

做建築師唔需要點讀, 肯讀肯畫就會識做.
做律師就要不斷地讀, 讀完亦都未必識做.

所以, 暫時我覺得, 要做律師, 比要做建築師, 更難.
可能我仲未搵到個學習模式. 仲需要一d 時間.

咁, 究竟 Architectural Lawyer 有型d 丫?
還是 Legal Architect 有型d 呢?

似乎, 只要畢到業, 就最有型...

雷同

2008-09-23T20:00:00.012+08:00

(八月某日, 係某網上渠道, 有以下留言...)

"頂丫!
睇篇Journal, 有兩成既字要查字典,
剩低果八成, 個個字都識,
只不過串埋唔識解......
如果唔明就跳過既話,
16頁Journal 真係可以3分鐘睇完......"

[ by PPPMMM, law postgraduate student at CUHK, 2008]

(及後發現, 原來, 二十年前......)

"OK. It was nine o'clock when I started reading.
The case is four pages long and at 10:35 I finally finished.
It was something like stirring concrete with my eyelashes.
I had no idea what the words meant.
I must have opened Black's Law Dictionary twenty-five times
and I still can't understand many of the definitions."

[by Scott Turow, law postgraduate student at Harvard, 1988]

自虐

2008-09-21T22:09:00.013+08:00

中學時代, 我是學校田徑隊短跑的運動員.

我對田徑不算是十分熱衷, 也不是跑得很好.

事實上, 中學生只要生得高一點大一點,

就可以入選田徑隊了.

中學生練習田徑, 也沒有太多科學的練習方法.

訓練就是一直不斷的跑跑跑跑跑.

而我一直懷疑, 短跑有什麼好練? 又可以如何練呢?

跑得快不就是因為生得腳長, 步大力雄一點罷了麼?

某次, 有機會跟一位師兄練習短跑.

那位師兄對於田徑是很有熱誠的.

而且跑得又快又好.

那次跟他操練, 偷懶的我, 只跟得一半,

因為覺得辛苦, 就放慢下來.

在場邊遠遠的看師兄如何自我訓練.

只見他在跑道上衝一段, 抖一段,

衝一段, 抖一段, 再衝一段, 再抖一段...不斷重覆.

在一個小時的練習時段中, 也沒有停.

去到最後, 見他跑得真的幾乎斷氣.

名符其實的"跑到嘔".

對於如此近乎自虐的強大的自我推動能力,

我覺很不可思議.

待他嘔完, 就問他何以如此難為自己. 他說:

"訓練就是如此. 一辛苦就停, 永遠不能突破.

因為感到辛苦, 那只是體能的安全警界線.

遠未到你體能的臨界點.

跑到反胃, 那就是你達到了體能的臨界點.

不斷如此練習, 到身體習慣了就好. "

我並沒有去深究他的理論是否完全正確.

卻很認同不痛不癢的自以為訓練, 成效很微.

又原來, 如果不懂得如何可以進步的話,

就只要, 亦只有不斷的努力.

自此, 我對於任何訓練, 一直都頗能刻苦.

也許, 辛苦的感覺能提供一定的自我存在感.

越辛苦, 亦即是越有作工.

所以, 面對一大堆要讀的要看的書,

昨日開始了刻苦的訓練.

07:30 訓醒一張開眼就睇
08:30 集中唔到, 訓左一陣
09:30 訓醒一張開眼又睇

13:00 拎埋書同老婆去食飯, 行左一陣街
16:00 番到屋企再睇
17:30 集中唔到, 訓左一陣
19:00 訓醒一張開眼又睇......
20:00 拎埋書同老婆去食飯, 係餐廳度睇.

21:00 番到屋企再睇

01:00 基本上睇晒~ 訓覺~

方法很笨. 但自我感覺良好~

至少, 出過汗, 會比較安樂一點.

裝備

2008-09-14T23:35:00.009+08:00

為了配合重返校園,
最近添置了以下的裝備:

1. 筆記簿型電腦

非常重要的裝備!!

因為我雙手在寫字方面已幾近殘廢.
然而打字卻可以非常準確.
於是一直心思思想買部筆電, 用以堂上打筆記之用.
加上家中的Mac 機跟學校的網頁不大匹配.
一部Window Vista的電腦似乎比較方便一點.

第一堂放學回家時, 路過電器店大特價.
用七折價錢就抱走了手中的Sony VAIO TZ28.
又輕又薄又細. 應有盡有, 電量更是驚人的耐用.
現在用筆電在堂上做筆記, 在床上寫Blog, 太方便了!

***

2. 紅色鉛芯筆

雖然雙手已廢, 不能抄筆記了 (就算寫了也看不到...),
但看書時雙手總愛有點事幹.
當中比較有建設性的, 就是間書.
我不喜歡螢光筆, 本來用紅色木顏色筆來間的.
但因為刨木顏色太不方便, 髒兮兮的.
又跑去買了支Pilot 的0.7mm 鉛芯筆.
紅免筆桿配以紅色鉛芯, 很好看.
十塊一支, 便宜又好用. 下次再買多幾支四處放.

工具嘛, 常用又便宜的就不要姑寒, 最緊要就手.

***

3. 不閃爍指向性枱燈

自從多了枕邊人, 睡前要開燈看書太為難了.
夜讀只限於手機上看E-book.

但教科書沒有E-book, 又不想浪費夜讀時間.
於是跑去買了一盞Philips 不閃爍指向性枱燈.
據說有電子部件, 可以令燈光不閃爍.
看書時眼睛沒有那麼易倦.
而且燈光有指向性, 也就不會影響枕邊人了,
是為夜讀良伴.

其實所謂"燈光有指向性",
只不過是多了一個燈罩...

***

現在每晚可以伏在床上,
開著筆電與枱燈睇書打筆記.
感覺像回到中學會考的年代~

新生

2008-09-01T13:26:00.007+08:00

九月一日, 終於開學了.

很奇怪, 對於重返校園,
我很在意, 也有點緊張.

大概是因為在未來三至四年間,
我將會接觸一個我沒有任何認知,
亦沒有任何把握的知識領域.

其實"接觸沒有任何把握的知識領域"這句, 很有點語病:
在單純的學習過程中, 實在談不上要有什麼把握.
只是我很快就跳到去考試/功課/畢業等事兒.

証明我是典型香港本地土產的學生.

最近, 我很努力地,
希望做一個跟以前不一樣的學生:
備課, 看書, 到圖書館, 做筆記, 很多很多.
可以說是手不釋卷. 都是以前從未試過的事.

我之前也幻想不到自己居然有這股狠勁.
然而當拿起厚厚的英文書苦讀實幹起來時,
卻有種自虐的暢快.

我喜歡舞台, 因為舞台讓我經歷另一種人生.
這次重返校園, 大概也是人生的一種重新演譯.

"如果我再做一次學生, 我理想的學生形象會是怎樣呢?"

在現實中, 我給自己寫了這份劇本, 搭了這場佈景.
所以, 這次不是深造, 而是一次自我實現的歷險.

納悶

2008-08-27T10:29:00.005+08:00

由於重返校園既緣故,
上週日係舞台上既演出, 應該係我既暫別作.

即時台下反應還算可以,
但我個人認為, 係劇場表演技巧上只是一般,
至少未達至自我要求.
有太多可以做得更好的進步空間.

以前既戲劇匯演, 算係業餘劇壇既盛事.
每一晚完左比賽, 係網上比較出名既劇場討論區.
都會有一些當晚演出既評論, 以及一些回應.
讓演出者同觀眾有交流既平台同機會.

演出之後數日,
一有時間就上網搜尋一下, 看看有沒有相關討論.
可惜連日來都未有隻字片語 --
不單只沒有對敝劇既評論, 甚至完全沒有有關戲劇匯演的題目.
就像是匯演這件事從來沒有發生過一樣. 甚為失落.

過往討論熱烈的劇場討論區, 一面倒的只是新戲上演的廣告.

我在想: 究竟發生了什麼事呢?

是業餘劇團公演的渠道多了, 不再重視戲劇匯演?
還是與其參加得個玩字既戲劇匯演,
不如book 個場公演搵真銀?

總之, 有點兒納悶.
畢竟做表演既, 最難過是做完沒半點回音.

相比之下, 好戲量家下日日都有人鬧, 其實都唔錯.
不過好戲量比人鬧實在非關戲劇本身, 那是另一個話題.

師妹

2008-08-21T09:14:00.003+08:00

公司內有很多小師妹.
最近來了一個頗觸目的.

此姝比我低了很多屆畢業, 連名字我也不知道.
只記得以前在公司實習, 畢業後也就回來了.
觀乎其個人風格, 大概是外國回流的吧,

女生在工作場所內受到注視的最主要原因, 當然是因為外型.
此姝樣貌身材算是不賴. 只是膚色有一點黑.
屬於會注目但不會覺得漂亮的一類.

最神奇的是她的衣著, 一向疏爽花俏.
令辦公室多一點色彩, 是好事.
不過, 吊帶背心短裙仔落地盤,
卻令許多男同事擔心她的人身安全.

小師妹有一個要好男友.
該男生有點面熟, 不知道是否也是同學.

在公司樓下, 有唯一的連鎖快餐店, 位處地牢,
全公司大概有過半同事到快餐店解決三餐.
地面部份沒有坐位, 只有一張小圓檯及兩張梳化作為點綴.
是為堂食外賣必經之路.

理論上, 人來人往又顯眼的地方, 不好久坐.
然而每日早餐及中午飯時, 例必見二人拍拖坐在疏化上拍拖.
或牽手依偎而坐, 或並頭同讀一份免費報紙,
或親咀, 或濕吻, 或愛撫, 或......不一而足, 恕難盡錄.
旁若無人, 愛得相當痴纏. 如此張揚, 幾近展覽無異.

我不知道我應否慨嘆些什麼,
私人時間, 公司以外, 干卿底事?
不過此姝行徑已成為幾層樓同事間的話題,
艷名遠播, 倒是事實.
或許當事人像我一樣貪慕虛榮享受注目.
只是彼此的舞台以及表演行為不同.

其實, 公司中也有很多小師弟, 不過不怎麼值得留意就是了......

大喜

2008-08-19T12:37:00.014+08:00

是日大喜!

公司出通告, 由十月起,
每逢第二個及第四個星期六, 無需上班.
不過每日放工遲十五分鐘.

如果一個月有五個星期六的話,
第五個星期六則如常上班.

經過一輪精密既計算.
大概一年工時少了 31小時, 約多了 4日假.

公司終於同勞動市場大趨勢接軌,
皇恩浩蕩, 感激不已~ 老闆好野~

其實早幾日已有小道消息流出.
當時一眾同事將信將疑, 有如此對話:

某問: 點解唔係隔週放假?
逢二週, 四週放, 第五週好易唔記得返工架噃...

某答: 如果只係隔週放假,
咁正常既提案, 則消息應該係假既.
家下逢二週, 四週放假, 一個月有第五週則第五週都要返,
簡單d 講, 即係放完假之後既週六,
係一定要返工, 絕對唔會錯既.
你亦只會有機會返多左, 而唔會返少左.
如此慎密, 算得咁盡, 應為大老闆親定妙著,
愚以為消息應該係堅既~ 汝等莫疑!

真高見也!

選科

2008-08-04T08:54:00.005+08:00

有一件算是不大不小的事情, 一直沒有記下.
就是我成功被中大取錄, 今年九月將修讀法學博士課程.

修讀原因,
一為放棄高薪厚祿既心理補償;
二為早日增強本身爭力, 而且法學博士名函實在可愛動聽;
三為無聊找一點事幹
雖然我是屬於舞台, 但總不成整天就跑去玩話劇吧.

法學博士實在不是博士學位, 其實只是碩士程度.
名頭據說是由美國人始創, 夠虛榮. 完全適合我.

今年四月收到確認信, 也交了點學費,
上網填了些少資料, 也就草草了事, 算是確認入學.

早前也煞有介事去買些法律小書籍看看,
最後當然也是不了了之.
但回想起來, 讀了多年建築,
好像也沒有好好的看完一本建築巨著.
小書被束之高閣, 也是可以預期的,
會乖乖的看完才怪.

今早收到大學信件, 開始要選修讀科目了.
整件事開始有點實在感.

四年業餘課程, 可有毅力完成?

破格

2008-07-23T09:01:00.003+08:00

某晚, 忽然接到敝劇團編劇A電話.

"點呀~ 你個仔出左世喇? 應該無咁早架噃."
"唔係. 有新野: 有戲上, 不過係演員外借. 有無興趣過去友團玩?"

原來友團有個角色空缺, 輾轉未能搵到演員填補.
友團負責人同編劇A飲茶講開, 結果就搵著我了.

之前因為斷斷續續搞左成年戲, 本來決定今年內唔再搞.
但同編劇A大約了解過個劇本同角色之後, 二話不說就接下來了.

姣婆守唔到寡啊~

決定演出既原因, 係因為之前都係做正劇,
有故事有角式背景有性格有起承轉合.
而今次係做一套荒誕劇, 我係做一個完全無厘頭瘋狂既司儀.

其實, 我"恨"做呢類角式, "恨"左好耐, 好耐, 好耐!

呢類角式比起之前做既, 要求演員技巧甚高,
再唔係好似之前果類正劇, 以文本故事帶動, 演員只要自然就可以.
雖然我並唔係專業既演員, 但係演出角式上一樣不希望被定型.
有突破有新挑戰, 實在令我興奮不已.

拎左劇本之後, 幾乎一得閒個腦就諗呢一後要點做, 果一句要點讀.
不斷幻想設計聲線, 型態, 表情, 甚至想學舞步. 算係史無前例地認真.

昨晚排練都第一課, 同導演單對單, 討論良久, 大家取得基本共識.

"總之, 你呢個角色, 要一上台就要吸引晒全個場入面觀眾既目光,
要認為所有人入黎, 都係睇我既. 擺出來就係舞台王者~"

嘩~~~ 深得我心!!! 捨命陪君子!

權力

2008-07-16T17:01:00.000+08:00

再來陶傑先生文章既下回:

<<無名工匠>>
陶傑黃金冒險號 1/2/08

不是不要報讀建築系, 只要抬頭看看:
北京,上海,香港,億萬金元的大手筆,
中國人永遠只信西方的"大師".

只有諾曼科士打和何索,膽敢開一個天文數字的價目,
把官員和地產商嚇楞,然後乖乖地簽支票付上期.

為什麼? 因為在中國歷史上, 由阿房宮到紫禁城,
中國從來沒有所謂建築家, 皇帝把他們當做工匠,
千百年的亭台樓閣, 一個名字也沒有留下來.

英國十七世紀重建火災後的倫敦,
大建築家雷恩(ChristopherWren),
不但留名, 肖像還上了十英鎊的鈔票.
十九世紀改建巴黎的奧斯曼, 一樣是歷史人物.
外國人承認建築家這一門的權威,
因為兩千年的幾何學家畢德格拉斯的名言:
"建築是凝固的音樂."

既然是這樣, 建築家和音樂家都世代留名:
巴哈, 海頓, 莫扎特, 貝多芬.
中國的音樂, 由<將軍令>到<步步高>, 還有<春江花月夜>
作者是誰? 問問中學生, 沒有一位說得出來.

不是他們"通識貧乏", 而是歷史上從來不尊重創作.
七百年來的傢俬和精瓷, 太和殿, 乾清宮, 是誰造的?
華文的書籍, 只草草一句:
"這些藝術瑰寶, 顯示了古代我國工匠的智慧結晶."

因此, 不論閣下如何天資聰敏, 在大學讀建築,
即使將來再有成就, 五百年後,
也不過是"我國"其中一位無名的"工匠",
這個國家不會記得你, 何必浪費時間, 壯志消磨?

外國的建築家, 既然是Architect,
在國王和貴族的面前, 他們是主人.
香港的建築師, 為地產老闆服務,
圖樣畫出來, 有一片庭園, 種兩棵樹, 立兩具雕塑,
老闆把你叫進去, 把圖樣迎面擲回來 :
"你知道這幅地我用多少十億投回來?
留這樣一幅空地, 不多蓋幾棟, 我少賺了幾多, 你知唔知?"

知道, 知道, 馬上乖乖改,
把庭園刪掉, 多塞兩幢六十層高的大樓.
巨大的Project, 由英國人諾曼科士打從倫敦傳一個圖則回來,
當中一樣有一個巨大的庭園,
有一片綠色, 堂堂政府就不敢吭聲了.
因為在潛意識裡, 你只是一名工匠,
雖然你跟那個洋人都是耶魯建築系隔三年的同學.
這就是為什麼這個社會一講"創意",
大可以當做笑話的理由.

讀大學, 避免選建築系,
在這一行, 真的, 何必做紫禁城其中一個無名冤魂呢?
他們曾經也是建築家, 名字在時間的風沙中吹過去,
一絲痕跡也沒有留下來.

**********

這兩篇文章中, 談及的問題有很多.
建築師只係一個引子, 借意嘲諷講現今中國祟洋媚外.

中國是否祟洋媚外不在此論.
不過外國建築家, 在國王貴族面前是主人?
我從來都不相信.

建築, 自古以來, 都係為權勢效力.

偉大的建築, 要用大量人力物力建成, 見證權力既轉移:
遠古時代代表神權既神殿廟宇
封建時代代表王室貴族權力既皇宮大宅.
中世紀代表教會權力既教堂.
近代代表了商界權力既摩天高樓, 銀行, 甚至名人大宅.
無一不是權力的圖騰.

在香港這金錢至上的地方.
公共建築一塌糊塗, 那個中央圖書館是更是世紀災難.
香港最聞名於世的建築, 並唔係教堂, 博物館之類.
而係兩間銀行總行. 以及一眾高密度的住宅.

所以啊~ 建築師, 從來都是臣服於權力之下.
何來做過主人? 就算是幻想都太美化了吧......

另一個是匠人問題.
文章太長, 下回再講.

更難

2008-07-12T08:57:00.005+08:00

經過件近一年既努力, 相信已贏得上司信任.
很多事情, 上司也會問我的意見.
在工作上有很大的自主權.

能獲得更大既權力和尊重, 感覺很爽很有勁.

畢竟我是貪慕虛榮的.

我不認為這全是因為我的能力所致.
事實上, 夠膽下放權力, 比起努力獲取信任,
前者比後者更難.

所以, 這位上司, 我是尊敬的.

見賢思齊.
能夠自主替上司做更多的決定.
就要學會上司的思考模式. 要與上司看齊.

相比之下, 更了解自己不夠決斷的弱點.
夠膽狠快果敢決定, 比起能提供多樣方案,
前者比後者更難.

一日未有一鎚定音的勇氣, 一日不能更進一步.

我的自信, 原來並沒有我想像中那麼多.

建築

2008-06-25T15:41:00.005+08:00

某日讀報, 本地才子陶傑先生有如此一篇有關本科文章.
只看題目已經不得了~ 今次姑且做一次文抄公.

<<不讀建築>>

陶傑黃金冒險號 31/1/08

中港的小孩進大學, 什麼系都可以選讀, 就是不要唸建築.

讀建築有什麼前途?
中國領土上的第一流建築, 政府和地產商,
都不會聘用黃皮膚的自己人來設計:
北京新機場, 是英國人諾曼科士打的生意;
北京國家劇院, 是法國人安德魯手筆;
鳥巢體育館是瑞士建築家何索的作品.

"阿爺"口味崇洋, 香港一群小的, 自然懂得跟風:
赤鱲角機場也重金聘用英國人科士打,
理工大學的一座什麼樓, 幫襯印度女建築家沙哈哈迪.
其他的什麼皇廷宮殿的豪宅, 地產商賺盡每一分錢,
一向不認為美觀的建築是一種成本.

因此, 請不要告訴我你讀建築系, 我會歧視你.

因為你雖然勤奮, 自小閱讀中外建築史,
五歲就對著一座羅馬怔怔出神, 十二歲隨同父母去羅省,
他們鑽進唐人街吃雲吞麵, 只有你堅持去外郊的亨廷頓圖書館.
十八歲, 你已經是東南亞英國殖民地建築史的專家,
從印度的維多利亞火車站到新加坡的舊郵政大樓,
一張紙一支筆就畫出全景, 終於以全優考進港大的建築系,
放榜的一天, 爹地媽咪在半島酒店的嘉迪斯,
請你吃一客牛柳, 隆重慶祝.

但一切純屬誤會, 中國人當建築師,
在外國, 一個貝聿銘, 已經用滿了配額,
你不會爬得上一哥的高位,
在本國, 永遠把你當三流.
同一個設計意念, 由諾曼科士打的建築師行,
用一個黑人徒孫電郵到北京,
對方如獲至寶, 甘心多付十倍的價錢,
當中國人發現, 建築圖樣的作者,
姓氏拼出來, 是Chan呀Cheung的,
或者是XYZ, 叫做ZhangXiaoYao, 武漢大學畢業,
他們會黑起一張臉, 把圖樣丟進垃圾箱.

在香港的大學校園, 看見一個建築系二年級的學生,
提著一個功課的Portfolio, 興緻勃勃走上樓梯趕上課,
令人暗自惋惜: 啊, 一個多麼天真可愛的孩子,
將來他畢業了, 就會知道殘酷的真相.

從前的寒酸文人, 呼籲小孩將來升學, "不報文科",
今天最現實的呼籲, 是照照鏡子, 不要報讀建築.
畢業之後, 遲早會淪為街頭的保育鬥士,
因為你的國家視西洋口味為Reference,
你的女朋友也會離開你, 她會淚水汪汪,
叫你不要那麼偏激: 何必去皇后碼頭絕食呢?
她認不出, 眼前的人, 曾經是一臉陽光, 拿著Portfolio,
從建築系授茶敘之後來赴約會的那個昔日的你.
你回過頭來怒吼, 竟然還打了她一巴掌......

**********

嘩~~~ 建築系出身, 真有那麼不濟嗎?

我不比那些中六已經捧住一大本建築書藉在校園中行來行去,
非建築不讀的同學.
當年報讀大學, 根本無任何特別鐘情的學科.
問問娘親讀邊科好, 佢話: "一係建築師, 一係醫生啦."
我怕串英文生字, 所以揀左建築.

點解娘親唔叫我做律師?
大概見我係屋企已經成日駁咀, 唔希望我變本加厲吧......

建築系取錄之後, 大概也沒有牛排吃.
讀得到讀得好, 是份內事.

我不鐘情建築史, 唔會對住羅馬神廟出神.
除左當年在大學, 要交功課之外,
平時絕對唔會發神經地拎本 sketch book 出來寫生.
記得某次電視台來訪問我有關建築的事,
為了令我更似一個建築系學生.
導演吩咐我企係上環海味街行人路旁度扮畫 sketch,
那時勢成騎虎, 只好煞有介事的畫.
回家看到節目, 自已也笑得從椅子上掉下來.
那本 sketch book 至今仍保留著.

其實, 是陶先生將建築太浪漫化了嗎?
實情又是如何? 對於被陶生歧視, 又何辯解?
尚有下文, 且看下回分解.

錯過

2008-06-24T00:42:00.004+08:00

一生人之中, 你可曾犯了什麼錯過, 因而錯過了些什麼?

早前, 有一位本科師妹到敝公司上班, 此姝相貌娟好,
當年在學校中不乏追求者, 但來者一一被拒.

原因是早於中學時已有一個赴笈外國的男友.
算是相當之痴心忠誠. 也不是秘密.

由於彼此早就相識,
加上她本在政府中工作, 有高薪厚職不幹,
同我一樣年尾流流走去轉工, 更被我視之為同道中人.
某日午膳, 與之同桌. 閒聊間, 也就問起近況.

原來小師妹本來待得愛郎學成回來,

決定政府職位有長工也不要,

一於嫁雞隨雞, 跟男友一起到美國定居發展.

原本準備好一切, 正打算影結婚相時.

男友的單親媽媽忽然發難.

要生要死, 覺得個仔要老婆唔要老母.

過去小師妹跟未來奶奶也不是沒有往來.

一直相安無事, 但一下子使蠻發難, 令二人不知所措.

男友不敢反抗, 連據理力爭也沒有,
沒有為小師妹發聲.

最後談不攏, 也沒有可談的空間.

小妮子只好將多年既感情,

連同當中既等待, 一次過棄掉.

"我覺得我唔可以將一生交俾一個不能夠企起身維護我既人..."

是十多年啊~ 太後知後覺了吧.
當中錯過了幾多更好的? 還有那無價的青春呢?

通通都是在消耗自己的機會成本.
只怪自已眉目如畫但有眼無珠.

那男的更可恨.
腰板不挺, 注定一世打飛機.

***

某日途經某麵店, 店外貼有標語如下:
"一次不來你錯過, 二次不來我過錯."

思之甚妙.

人生有很多事情沒有第二次.
一次錯過, 可能變成一生過錯.

反而亦然.

價值

2008-06-19T09:14:00.003+08:00

人的價值觀, 是一種很奇妙的東西.

小時候, 每日返學有兩蚊買野飲,
買廿蚊玩具, 要儲好多日錢.
那時候, 手中能夠儲到一百蚊,
已經是件很了不起的事.
為了賺幾十元稿費買'機甲創世紀"模型,
會投稿去報紙校園版. 最後當然沒成功...

父親錢銀方面一向疏爽, 所以我小時候從不知道賺錢辛苦.
對於錢, 何謂多, 何謂少, 當時亦沒有很深刻的概念.
十幾廿年前, 那時我是中三, 需要為未來選科,
湊巧當時個人電腦開始普及.
那時跟同學約好, 一齊去買電腦, 自已自修會考電腦科.
當時以為一部七八千蚊的電腦是小事一宗,
而且是為學業嘛~ 爸爸一定答應.
某在餐廳晚飯時開口要買, 結果爸爸面有難色,
初時覺得父親小器而拒絕. 死扭爛扭之下, 父親屈服.
後來回想, 當年的七八千, 大概等如今時今日的萬五六.
是一個月的人工了...相當之唔生性.

到大學, 仍然對錢無太大認知.
而真傳自老父"搵得來, 駛得去"既態度, 仍可晚晚唱 k落 bar,
係銅鑼灣一個鐘行一圈, 買幾千蚊衫毫不手軟.
那時屋企算不上有什麼財政支助.
自己搵來許多的 freelance, 加上 grant & loan
流動支金總算不缺, 加上有信用卡嘛~
碩士畢業時, 卻已負債十多萬...
畢業後用左三四年去重整債務.

今時今日, 我仍然對錢無咩概念.
係同一個財政狀況之下,
有時會覺得一個四十元既相機布袋仔好貴,
行幾個圈諗成個鐘都決定唔到買唔買,
但又會認為近萬蚊既一支LEICA 鏡係好抵,
唔需要半分鐘就聯絡買家唯恐不及.
又會一邊叫窮, 一邊又走去買股票, 買完仲要係跌既.
什麼是貴? 什麼是平? 咩係值? 咩係唔值?

細個時覺得一千蚊係好多.
現在我都會覺得一千蚊係好多.
原來個人金錢上既價值觀, 係無隨外圍環境因素升值.
大概係因為人工一樣無隨外圍環境因素而增長吧.

記得以前我工作上既啟蒙老師,
原已做到本港數一數二大則樓既 director,
某日毅然離開高薪厚職, 走去大學教書.
當時年紀小小既我不明所以, 點解有錢唔要?
佢離開之前同我食飯, 我問左佢, 佢就同我講:
"我唔需要become rich, 我只需要 feel rich"

"我只需要 feel rich!", 幾咁瀟灑幾咁有型!
對於長期糧尾既我, 實在係一種開悟與解脫.
無錢, 唔緊要. 我心中富有, I feel rich~

只係當時唔記得, 十幾年前佢講呢句說話既時候,
已經手執最少會景閣, 灣同馬鞍山三個物業,
教書之餘仲自己開左間公司.

今時今日當然明白,
唔become rich, 實在係好難 feel rich 既.

所以, 都係唔好發夢掛住寫blog, 努力工作......

過錯

2008-06-18T08:43:00.002+08:00

沒有去試過, 怎知他錯.
就算我錯了, 亦必需繼續.
痛苦時, 有眼淚去中和.

曾經, 每當做錯事, 受挫折時, 自我療傷系統啟動,
以上歌詞就會在腦中自動響起.

年輕時沒有經驗, 錯了也就是錯了, 坦然承認, 改過.
而我一直認為未碰過釘子的人, 絕不是一種祝福.

年事漸長, 經驗越多, 那歌已甚少派上用場.
原因係犯錯既機會漸少, 而可以容許犯錯既機會更少.

近日, 忽然又記起這歌.

原來不論哀樂對錯, 人總要不斷向前努力.
許多事情, 是不可猜想不可預知的,
總之走得一步是一步, 只可以盡量要走得穩, 走得好.

因為明天仍要繼續.

*******************************

<<明天仍要繼續>>

曲:盧東尼詞:向雪懷

沒有去試過怎知它錯
就算我錯了亦必須繼續
痛苦時有眼淚去中和

沒有去愛過怎知它美
沒有你愛我問怎可脫俗
那管它世界未原諒我

多奢侈的夢
一朝醒覺時盡變空
你看我時沒有淚容
愁懷懸在半空

明天縱多苦痛
命運繼續來
一點不放鬆

明天冷風吹送
面上有熱情仍流過

相書

2008-06-17T04:42:00.001+08:00

無聊 click 上 Facebook, 發現舊同學結婚了.
婚宴照片也給貼在 Facebook 上.
唔上去望望, 係完全唔知佢已經結左婚.

對於年代潮物 Facebook,
我一直有多少抗拒, 或者應該話係投入唔到.
總係覺得介面混亂又繁複. 亦唔明白有幾好玩.
加上公司禁制左上 Facebook, 辦公時間不能 click click click.
縱使有個戶口, 卻並不活躍. 只係虛應其事, 湊湊熱鬧.

及至最近, 我方明白Facebook 有一個好成功既地方,
就係令終日對住電腦自閉既人, "覺得"好似有好多朋友.

只要你註冊左, 每天你的電子郵箱最少會收到十封八封的電郵.
可能係 flirt 下你, 可能係叫你扮下海盜疆屍,
又或者叫你出賣下朋友, 俾d 網上短片你睇下等等.
閒時都會上去 click 下, 了解下其他人做緊乜, 聊勝於無.

十年都唔真正見一次面, 電話唔多一個.
但日日靠自動系統發信連絡. 似親實疏.
搭單朋友既感覺, 非常強烈. 亦相當被動.

曾經成日諗, 如果有一天我意外離世.
我既朋友點先知我死左呢?

原來, 只要有人幫手, 用我戶口將卜告往相書一貼,
從此不論親疏遠近, 各人只要打開電郵,
即見: PPPMMM left you a FunWall comment!

都幾黑色幽默.

遲到

2008-06-16T11:46:00.006+08:00

星期六, 又下大雨.

醒來望望床邊電視的新聞報導,
不像上週的黑色暴雨, 又是要返工的一個星期六.

下雨天氣氛郁悶, 整個人都是迷迷糊糊的.

Reception 打電話進來 : "外邊有人找你."

星期六一向不見客, 況且是下雨天, 奇怪是誰個不請自來.

走到大堂, 居然是前公司老闆, 太子, 太子的大哥, 以及前上司.

當你不是員工的時候,
老闆及上司總會擺出一貫的禮貌笑臉.
明白是技術性需要, 所以未至於討厭.

反正, 我也是一樣的微笑著.

太子先開口.

"怎樣, 生活好嗎? "
"很不錯"
"工作呢? 可以吧"
"很好. 做得很開心."
"回來幫我吧..."

我笑笑搖頭.

"有什麼問題? 我公司有哪個地方不好?"

我認真的想了一陣子.
"我想, 是因為你們沒有給我應有的尊重."

說完, 我就走了.

忽然, 有人拍拍我.
"老公, 起身返工喇~ 遲到喇..........."

"媽的! 大太子哪有大哥...... 走左大半年都唔放過我, 累我遲到......."
一邊換衫, 一邊埋怨, 心中卻很暢快.

布施

2008-03-08T09:53:00.012+08:00

有人話"做那行, 厭那行"
我亦很少提及有關建築的事.
並不是因為厭倦, 而係無把握三言兩語說得清.

係香港, 建築師係一種好奇怪既存在.
嚴格黎講, 香港係無"建築師"既.
喚作"則師"會比較貼切一點.
因為大部份建築師既日常工作,
都只係畫"則", 而唔係建築設計.

至於點解叫"則師", 咩係"則"?
有云畫"則"(音"積") 實應為畫"側"
即係畫側面立面圖(Elevation)及剖面圖(Section).
立面圖及剖面圖係了解建築物三維空間結購既重要圖樣.
係設計上比起平面圖更為重要.

係經濟起飛既年代,
成日聽人地講話發三師: 醫師, 律師, 建築師.
但香港地少. 今時今日, 建築已經無復當年.
一個則師, 只要考到牌成為政府認可人仕 (Authorized Person)
從此個簽名就有特殊既法定效力, 可以有一d 簡單既外快賺下.
例如幫人搞下牌照轉名, 處理下清拆令, 或者幫人搞下改建.
簽個名少則數千, 多則數萬.
專業人士嘛~ 合該如此.

之但係好多時我都唔多想搞.
尤其是係處理住宅既清折僭建果類,
主要係因為煩, 另外係唔知收幾錢好.
收得貴又唔好, 收得少我又唔開心.
但因為我同意左將個contact 登係個list 度,
而我個名既 initial 係個list 度排得好前, 所以成日收電話.

雖然有人打來我都係話佢知我唔會做,
但如果登得個contact出來,
人家搵你你又推人, 又好似好衰咁.
而且有好多收信既人, 都係住舊區, 唔算得係知書識墨既人.
一收到政府信, 又話要拆又話要告就好擔心.
所以我會係電話度同佢解釋番信中講既野.
講下責任同後果, 之後教佢可以點樣自已做/搵人做.
感覺上好似讀完書都仲可以幫下人.

做建築, 應該係為社會, 市民及用家而設計.
然而日常工作要為發展商出謀獻策, 為虎作倀.
良心上常有點過爾不去.
能為素未謀面既人解答下建築疑難,
呢樣野已經成為我個人既一項小小公益事務.
非常樂意平衡一下心理.

一面作孽, 一面布施. 只因人在江湖.

計數

2008-02-26T09:00:00.003+08:00

我閑時喜歡計婆仔數.
例如最近既腦中成日諗既個人財政預算案如下:
___________________
支出
讀書 : 200k
稅貸 : 100k
徠卡 : 30k
個人旅行 : 40k
全家旅行 : 60k
如果生仔 : ???k

收入
今晚六合彩頭獎: 25000k
___________________

咦~ 原來仲有大把剩! XD

搏命

2008-02-17T16:09:00.004+08:00

最近, 逃跑日誌變成了逃跑週記.

原因是工作忙了, 精神生活豐富了,
也就少了時間花在這個情感宣洩的地方.

對比起過去一日可以在公司內打好幾篇BLOG 的日子,
現在忙碌的生活令我很滿足. 有著實在的存在意義.

我想, 我從來不是一個愛躲懶的人.
有事做事, 沒事也總要找點事幹.
能夠令我連丁點東西也找不著來幹的日子, 真的很不可思議.

近來的生活終於回復舊觀:
工作時很投入, 放工時很輕鬆, 離開公司時很瀟灑, 公事亦很上心.

我很喜歡每天睡前為明天安排好一切工作的感覺.
因為那表示我可以控制環境, 而不是被環境控制.

上星期我病得很兇,
星期一, 沒有請病假, 因為要為老闆準備星期二開會的功課.
星期二, 沒有請病假, 因為有會要代老闆開.
星期三, 沒有請病假, 因為星期二老闆開完會可能有事要分咐.
星期四, 沒有請病假, 因為星期三老闆病了, 今天會有分咐.
星期五, 病得半死了, 不能不請病假, 只休息了半天, 下午去開完會, 再病過.
星期六, 沒有請病假, 因為星期一老闆又要開會交功課.

結果星期六放工後, 睡了一整天, 今天身體終於轉好了.

我明白過去一週有一點自虐.
卻很高興仍交足功課, 人也沒有死掉.
我很喜歡那種盡責搏命的感覺.

這大概是一種不正常的發奮:
是基於回歸舊公司後一種落後於人的不甘心, 一種想追回過去的蠻勁.

那也好, 有機會追, 而又有能力追, 畢竟也是好事.

我想, 今年最終會有成果的.

誤解

2008-02-10T13:00:00.000+08:00

年初三赤口, 和友人B 乘的士往同學家火窩團拜.

車程之中, 少不免先來稱兄道弟一番,
再談起近來熱話既藝人淫照:
_______________________________________________________

我: 你估個位黃助理處長, 唔知呢單野之後仲有無得升職呢?

友: 佢傻仔之嘛~ 處長都咁鬼輕佻.

我: 睇佢現場所講, 佢應該真係覺得D 相係"正"架喎.
一句說話就令到全港網民成為朋友, 仲勁過死鬼羅文唱"獅子山下".

友: 不過早幾日問過我兩個當差既親戚, 佢地就好支持自已友.

我: 何解?

友: 佢地認為警方執法, 有咩問題?

我: 執法係無問題丫~ 問題只係選擇性執法問題.
咸相既野, 打從第一日上網, 要幾多級都有啦~ 但從來都唔見有咩網上掃黃.
家下幾張藝人咸相, 要到一哥出黎解話, 仲高調拉人封艇, 咁阿一咪好唔得閒?
仲要以為咁就可以杜絕, 絕對係對網上既遊戲規則缺乏認知同理解.

友: 佢地又唔係咁睇, 佢地覺得單野家下搞到咁大,
全港既人都講緊, 仲日日頭版, 關乎到 public interest, 所以要著緊跟進.

我: 大佬呀~ public interest 係解"公眾利益", 而唔係"公眾興趣"喎......
幾張明星咸相, 明顯無損公眾利益, 而只係公眾有興趣既八掛新聞.
咁唔叫 public interest, 只係 the public feel interesting .
你話為左拉果個發放淫褻不雅物品既人都仲叫講得通.
如果話搞咁多野勞師動眾係為左公眾利益, 我就覺得幾好笑.
最慘就係拉到發放果位人兄既機會, 係好低好低.
家下搵個糊塗人, 高調處理一件沒有了局既糊塗事,
絕對係一趟渾水, 只有糊裡糊塗地了結. 係白忙一場既笑話.
_______________________________________________________

談話間不知不覺到步.

入屋後先互相恭喜一番, 隨後屋主除左開定部Wii 招呼朋友之外,
亦不能免俗地開定電腦入面個FOLDER, 同一眾來訪者分享最新珍藏.
男男女女, 評頭品足, 看個不亦樂乎.

好朋友嘛......

珠美

2008-01-31T16:31:00.000+08:00

一月三十一日早上九點鐘,
剛買完早餐回到公司樓下.
手機響起, 原來是細佬打來:
弟婦剛進產房, 小BB 今天要出來了.

中午十二點, 老媽又打來:
小BB 出來了~ 母子平安.

小BB比預期早了三星期出世,
五磅幾重, 少少輕, 但很健康.
後來我才知道原來她的父母恨抱金豬女,
整天都對肚中BB 說: 妳來D 出黎啦~ 妳來D 出黎啦~
我還是第一次聽見有人如此催生......

結果BB 很聽話, 豬年年尾趕出來逗利是~
所以我取'豬尾'諧音, 喜歡叫佢做小珠美.

小珠美出世第一日的晚上,
我和太太去探她和新任媽媽.
新媽媽很精神, 完全不像剛生產完似的. 非常厲害~
細佬同弟婦都係靚仔靚女,
根據遺傳學, 小BB 應該都係靚女一名:
面仔圓圓, 下巴尖尖, 表情也多.
老媽說她耳仔很貼面, 生得好相貌.
據說不太哭, 哭聲也不大, 很乖很斯文.
最重要的是雙眼又圓又大, 完全承繼了父母優點, 真好~

小珠美出世, 似乎我比其他人都要興奮.
口中整天 BB BB 的叫, 恨不得明天佢就會行會走.
有小MODEL 給我影相, 又有可以同我玩.
我仲打算買好多BB 衫俾佢換. 仲可以帶佢去公園玩~
唔駛生唔駛養就有靚BB 玩,
有咩事會開心得過咁樣?

其實, 我都係一個小朋友,
小珠美似係我既大玩具同玩伴多D.

好希望佢快高長大.

緣法

2008-01-17T22:10:00.000+08:00

前幾日(就係紅棉初開之日), 係公司派花紅既大日子.

公司去年業績強勁, 年尾相當之鬆手,
人人入完老細房拎住個信封出來, 大多都笑逐顏開.

雖然知道工作表現上老細相當滿意.
但作為一個剛滿試用期既新人,
自然不敢對花紅加薪寄與厚望 (淡淡薄薄的奢望, 還是有的...)
市場上既基本遊戲規則還是要遵守的.

結果是意料之內, 情理之中:
加薪是沒有了, 花紅倒有少許, 幫補一下過年與稅款.

其實在決定轉工當日, 早已知道年尾的下場.
反而是新老闆比我還在意, 我入房拎完信後,
還致電我解釋為何未有加薪. 反而令我感到有點尷尬和意外.
畢竟我只是他其中一個上班三個月的下屬,
他實在無需要向我解釋什麼.

近日心中常想著一句話: 各人自有各人緣法. 如是因, 如是果.

如果我介意年尾花紅不夠多,
沒有升職加薪, 那是說不過去的.

當日人工偏低是因, 追求高薪離開是果.
之前沒有自由是因, 放棄高薪離開是果.
兜兜轉轉, 也就轉了回來.
有些人的本位, 是離不開, 逃不掉的.

昨日因, 就是今日果.
老細以為他本人是今日之"因", 其實緣起在我.
前因早種, 今天只是當中果報.

放下電話之後想到這裡, 心裡隱隱有點不安,
於是就跑到老細房對老闆說:
今日的結果, 早於十四個月前早已種下. 那是我的選擇.

笑笑講完, 行返出房,
可能老細覺得好奇怪,
但我自已舒服左. 其他的也就懶理.

紅綿

2008-01-09T09:09:00.001+08:00

戴著耳機, 聽著音樂,
由中環地鐵站步出, 如常地淡然地上班.

在馬路旁等候過路綠燈亮起的時候,
瞥見立法會大樓門前的一棵木棉,
樹頂部份已先有紅花俏俏地開了.

"紅綿盛放, 天氣暖洋洋. 英姿勃發堪景仰..."

腦中存來的一整首紅綿, 自然而不自控地,
override 了耳機傳來的聲響.

回到公司搜尋一下.
噢~ 原來又是鄭國江的作品.
填詞, 林夕是量產潮流, 偶有佳作,
但鄭老師作品才叫有文人氣度, 歷久不衰.

腦海中的鄭國江把耳機裡的林夕 KO 了.

見到木棉花開, 今天應該是個好日子, 心裡有春天的感覺.

*******************************

<<紅棉>>

作詞：鄭國江　作曲：鐘肇峰

紅棉盛放　天氣暖洋洋
英姿勃發堪景仰
英雄樹　力爭向上
志氣誰能擋

紅棉怒放　驅去嚴寒
花朵競向高枝放
英雄樣　萬眾偶像
紅棉獨有傲骨幹

我正直無偏　英挺好榜樣
有上進雄心　堅決爭光
結棉子　借風飄
四方樹苗堅壯

紅棉盛放　天氣暖洋洋
英姿勃發堪景仰
英雄樹　力爭向上
紅棉獨有傲骨幹

傢私

2008-01-02T15:53:00.000+08:00

年近歲晚, 開始整理屋企.

夫婦倆總覺得屋企沒有別人家的整潔.
歸咎於家中缺少儲物空間.
總果決定去多買一個衣櫃放於睡房中.
早幾日到傢私公司付款作實, 本週六送貨.

之後, 我開始坐立不安.

連日不斷思前想後:
其實係唔係有需要一個衣櫃呢?
會唔會執下其他既櫃, 掉緊d 野, 就唔需要有個衣櫃呢?
多左個衣櫃, 睡房係唔係太迫呢? 會唔會訓得唔好呢?
搬衣櫃入屋時, 會唔會括花面牆呢? 會唔會入唔到房呢?
多左個櫃, 間屋會唔會都係一樣亂糟糟呢?

之後, 係屋企行來行去左度右度,
又去開下d 櫃睇下其實放左d 咩.
又搵下d 舊相, 睇下上手間主人房有無放衣櫃.
又擔心下有無地方俾人裝衣櫃.
又去模擬一下多左個櫃之後如何上床落床...
總之就悶悶不樂. 甚至連新買既模型都唔想砌住,
要等衣櫃裝好先開始.

雖然只係一個衣櫃,
但原來只要環境有些微改變, 我都會好不安.
我懷疑自己係唔係有些少自閉症或焦慮症.

後來發現, 最大既問題, 應該係間屋太細.
如果有間屋係三千幾四千呎, 再加埋有兩三個工人,
咁莫講話多一個衣櫃, 就算多個貨櫃都無有怕.

新一年, 要努力上進賺錢~

接力

2007-12-22T09:16:00.000+08:00

人生, 往往有很多無厘頭既驚喜.

大學同學A 熱愛運動, 足球籃球乜球物球都愛.
我自己都係波牛一名, 由小學開始踢左十幾廿年波.
讀書時常與他一起去踢足球, 瘋狂時期一星期踢三場.
畢業後我就掛靴歸隱(其實即係懶~)
同學A則非常投入地加入學會, 做其 SPORTS COMMITTEE 去也.

上星期六, 忽然接到同學A 來電.
說是醫學學會係星期日搞左個運動日, 有個專業學會接力賽.
問我有無興趣替學會跑接力.

實在小弟都曾經係一名田徑好手, 短跑擲項都見得下人.
係學校田徑隊隊員, 更常替學校跑友校接力.

不過, 唔係大學, 而係中學年代...
對上一次跑 4x100m 接力, 應該係講緊中六. 即係十幾年前既事.

我除左係屬於舞台, 亦係屬於田徑場既.
運動場都係英雄地, 凡係英雄地我都喜歡~
雖然近來缺乏走動, 但一諗起又可以係泰坦地上面奔跑.
鬥心一經點起就不可收拾. 4x100m, 也不過一分鐘左右時間.
加上同學A 專車接送往返沙灣徑運動場. 於是一口答應.

第二日午後, 一身運動服裝,
坐住同學A 架 CLASSIC MINI, 由青衣去到沙灣徑.

到達運動場時, 同學L及另一位隊員B已在等候.
同學L是我早已認識的, 很高大的一個傢伙. 擅打籃球.
隊員B則是初會. 相當年輕既一位伙伴, 標準運動員身型.
當日早上, 原來B 剛跑完了田徑總會的一個 15km 長跑.
同學A 因為早前拉傷了腿, 所以是日只當領隊, 並不打算參加接力賽.

最後一位, 據領隊同學A 說, 是另一位籃球隊隊員.

尚有一人未到, 無得練習, 只有紙上談兵.
分配一下位置, 講下誰個跑先, 誰個跑後.
傾談間發現, 原來在場三位跑手中,
只有我是跑短跑, 並且有 4x100 經驗...

離比賽時間尚有半小時, 滴汗也無補於事. 唯有由接力ABC 講起:
何謂接棒區, 如何接棒, 如何預位, 誰個跑彎路, 誰個跑直路.
誰個左手交, 誰個右手接. 一一交待.

經過領隊協商, 決定我跑第一棒, L 號第二棒, B跑第三棒.
同學A 口中, 做開運動, 跑得OK 快既但未出現既 D 跑最後一棒.

安排定當後, 隊員D 及時出現.
原來是一個戴眼鏡, 頭半禿, 帶著老婆仔女一齊來, 相當和善既中年人...
只係點睇都唔似係"做開運動, 跑得OK 快" 既人.

"嘩~~ 原來一個二個都係後生仔, 我以為係同樂日添~ 哈哈哈~ 早知我就唔來咯~"
莫講話三位隊員, 連同學A自己都O晒咀. 場面相當有喜劇效果.

最後發現, 應該係陰差陽錯, 領隊A 搞錯左一個同名同姓既人.

陣容同幻想有別, 又要再排一次,
D 跑第一棒, L 跑第二棒, B跑第三棒, 我跑第四棒.

安排好後, 大家出去熱身.
當日其實係醫學學會既親子運動會, 競賽氣氛不太熱烈.
不過見到好多小朋友係跑道上鬥快跳豆袋, 感覺有趣.

熱身時候, 見到另一隊接力隊, 隊員一身彪悍短跑身型,
加上自備的那對釘鞋及接力棒, 已知非比尋常.
試問一般運動愛好者, 又點會有一對比賽專用既釘鞋同接力棒呢?

上前同其中一位跑手示好, 原來是來自測量師學會既.
事到如今, 只有盡力而為. 唔好輸得太難睇.

以前跑接力賽, 賽前總會練習一下交棒接棒.
但由於今次隊員們從未有接力經驗, 拉雜成軍的鬥心也是一般,
距離起跑又只有十分鐘左右, 要求練習似乎是太過苛求左D.
總之輕鬆隨緣好了.

熱身未到十五分鐘, 又有另一意外: 隊員D 熱身時拉傷肌肉, 跑不了.

結果只好由同學A頂上, 又再重新組合過位置.
A 跑第一棒, L 跑第二棒, B跑第三棒, 我跑第四棒.

重新安置好後, 又再各自熱身, 同學L俏俏地走過來說:
"雖然咁諗好衰, 不過總係覺得咁樣拉傷, 有D 假假地..."
唉, 我又何嘗唔係咁覺得呢~
"做開運動, 跑得OK 快" 既人, 又點會咁易熱身時已拉傷...

講完無幾耐, 就要到起步點報到, 開始上線.
我們是第五線, 好彪悍既測量師學會隊伍, 是第四線.
無巧不成話, 早前與其寒暄兩句的那位, 與我同是跑第一棒.

既是親子同樂運動會, 對司線員的水平也就很難有任何要求.
當司線員高叫"ON YOUR MARK! SET..."時
我明明還未SET, 他已叫 GO 了~
就在一個半SET 未SET 既姿態下,
也不理三七廿一, 雞咁腳起跑再算.

短短一百米, 一般來說大概也不過十一至十三秒左右.
話說臨近接棒區, 第四線既朋友已經追上來了.
當他把接力棒遞前, 將要交棒之際, 意外就發生了!
一聲相當鏗鏘的聲響, 我左手的接力棒, 把他右手的接力棒打跌了!

由於是電光火石間既事情, 當時未有細想.
而據事後推測, 當時我與他距離應該甚近,
第四線的他在我的左側. 我用左手交棒, 並且應該是用右手交棒.
第一棒跑彎路的, 要步大力雄. 而且要貼近左手邊內圍跑.
只要腳不過線, 基本上上半身好多時係過左隔離線既.
可能係咁既緣故, 佢右手手上既棒,
就俾我傾側向左既上半身, 以及左手手上既接力棒,
隨住有力的手部擺動打掉了......

當時他對接棒區人員投訴, 不過司線員說我並未有過線, 不算犯規.
我仔懶理那麼多, 直跑向終點為隊友打氣.

最終, 醫學學會得了冠軍,
雖然在第一棒時落後了, 但畢竟測量師學會還是很強
第三棒時把落後了的都追上, 得了亞軍
而我們則得了第三名.

直到頒獎前, 友隊還在向有關人仕投訴跌棒事宜,
當時想了好久, 沒有過線的我可有犯規?
我相信犯規是沒有的, 只是意外一件.
況且只是一場友賽, 不斷的投訴, 未免有點小器了.

反而賽後有工作人員問我們可會上訴,
原來起跑時, 司線員溝通不足,
離起跑點最遠的第三接棒區根本未準備好.
我們的跑手未到線上, 已起跑了.
不過既然已經跑左, 都係大家開心下. 也就算了~
難道再跑一次麼? 也不見得名次有何改變吧.

至於我嘛~ 無比賽十幾年, 無啦啦又有得拎個銅牌,
已經非常高興, 過足癮了.

最重要既係, 那場接力賽, 共有三支參賽隊伍.

友誼第一~

成績

2007-12-12T14:11:00.000+08:00

話說, 小弟其實從來都未見過自已大學張成積表既.
總之求學不是求分數, 目標為本.
讀左五年大學, 拎左兩個學位, 已經達標.
成積, 係無人過問既.

最近因為想報讀學位課程進修, 於是就走番去大學,
要求校方送一份 Transcript 去中大, 另外自已拎番兩份備用.
(我甚至唔知原來 Transcript 中文就係成積表...)

今日去郵局拎成積表掛號信,
光天化日之下, 打開成積表一望.
唔睇由自可, 一睇之下,
方才發現原來自已的成績都算幾差勁.
最少, 同我幻想有一段距離:

Yr 1: 4C 2B
Yr 2: 4C 2B 1D -.-!
Yr 3: 4C 1B 1A

Yr 4: 3C 1B 1A
Yr 5: 4B 2A

三年Bachlor Degree 當中,
六成三都係C, 仲有一個D. 睇完都有d 冒汗...
好在由學士到碩士期間似乎有點開竅. 成積總算拾級而上.

最近睇網上論壇,
有人話如果 Bechlor 時拎Second Lower Honour,
好多時大學係唔會收你讀Master 既.

如果真係咁, 我應該係一個好幸運既人. :p

播客

2007-12-01T09:07:00.000+08:00

留連網上多年, 如果數在網上最快樂既時光,
應該係當年與一眾損友搞小型網上電台的年代.

當年因為一個網友接受了某電台訪問,
因而引起大群網友搞個上電台的興趣.
由有意念到成立, 亦不過一星期左右的事.

最初只係買支三十幾蚊既電腦咪仔, 係屋企玩玩下.
後來直頭有人捐贈左個panel 出來. 頗為認真.

當時podcast 尚未流行, 所搞的都時現場直播.
兼且亦可用icq 同聽眾即時互動,
有閒聊清談, 亦有播歌點唱. 相當過癮.

網上小電台維持左大約一年左右光景.
後來, 因為各種人事及技術因素而停播.
過往錄起的電腦檔案, 亦因為一時大意,
在重組電腦時被我全刪去, 追悔不已.
逝者如斯, 死者已矣, 也沒奈何.

早前, 肥仔 ipod nano 剛推出,
又可以睇戲又可以聽歌又可以打機.
貪過癮買左一部.
但其實, 我係甚少行街聽歌的.

結果, 結果部 nano 最大既用途, 就係用黎聽podcast.

因為自己係新手 Mac 用家的緣故,
最初主要係聽 cmm.hk入面既"大蘋果時代",
後來, 又download 埋 "舊街坊, 新茶樓",
同做得相當出色既"醫生會伊人"
一口氣把全數近百集podcast 放入 nano 中, 連煲數日.
就此勾起我對過去網上電台的愉快回憶.

早幾日, 發起傻勁, 三十幾歲人.
發了個電郵去cmm.hk, 向台長毛遂自薦.
記憶中係過去幾十年內, 我都未試過做類似既事.

整個行為相當冒昧, 只係一味膽粗粗.
覺得想做, 就要行動. 最少要試下.
學蔡瀾話齋: 試, 五十五十, 唔試, 係零.

結果cmm.hk 台長林子揚回信, 有機會約見面談.
開心到死, 未出發已先興奮.

在平淡的生活中, 其實只要願意, 主動,
仍可以自製的很多有趣的變化.

"敢想, 敢問, 凡事皆有可能"

未來

2007-11-28T22:01:00.002+08:00

在現實生活的困迫中, 有過堅持過夢想的那團火嗎?

劇團十年慶祝之後,
有人在劇團的BLOG 內, 有人POST 了這一首MV.

看著MTV畫面,
想起過去十年, 曾經熱愛, 放下, 又再重拾的興趣.
想起各人, 也不過是地盤佬, 寫稿佬, SALES 佬.
想起現在每個星期日, 放下一切, 丟低太太,
唔去玩, 唔訓覺, 獨個兒走去排戲...

一個人, 看著想著, 番看又番看, 很有點感觸.
好幾次, 幾乎跟飯堂叔叔一起流下淚來.

我不知道我為什麼感動.
事實上我也不知道我現在堅持的是什麼, 又或者追求的是什麼.

那種感動, 可能是出於對少年夢想的辜負與背叛,
因為執著, 不忿, 不甘心. 於是背城借一.
用餘下的力氣和狠勁, 圓了卑微的願望.

縱然, Mr. Children 曾講過,
"Kurumi" 只是一個發音, 是一個女孩的名字.
我不懂得日文, 有網友另行解釋:
"kuru" 解作"來" "mi" 作"未"

可能是穿鑿附會, 但我還是寧願相信,
"kurumi", 就是 "未來".

_________________________________

くるみ - MR. Children

喂～ Kurumi
這街道的景色在你的眼中是什麼模樣呢？
現在的我看起來又是怎樣？

喂～ Kurumi
若是旁人的關心也讓你聽起來像挖苦似的
那個時候又該怎麼做才好呢？

只是回想起過去美好的一切
卻讓人的心情更自覺得瀕老
在這樣的生活裡頭
如今　我正要動起來了
因為我不想只做個齒輪而已啊
伴隨希望的衍生而增加的失望
即使如此明天的內心依舊悸動
「究竟會發生什麼事呢？」
試著去想像看看吧

喂～ Kurumi
假使時間的河流會將一切給洗刷帶走的話
那生存這件事就變得再容易不過了

喂～ Kurumi
在那之後我一次也不曾讓眼淚流下來
可是　讓我能夠開懷真心的笑卻也很少

不知在哪裡扣錯了
發覺到的時候才知道多了一個鈕扣
就像這樣地要是能和某個有多的鈕扣穴的人相遇
讓一切變得有意義就好了
伴隨邂逅的次數而增加的別離
即使如此內心仍因希望而跳動
每當在走過十字路口的時候
難免也會有迷失方向的時候

總是乞望想擁有比眼前更多
為了追求那不變的愛而高歌
於是齒輪不停轉動
超過必要的負擔
讓齒輪一面發出嘎吱的聲響
伴隨希望的衍生而增加的失望
即使如此明天的內心依舊悸動
「究竟會發生什麼事呢？」
試著去想像看看吧
伴隨邂逅的次數而增加的別離
即使如此內心仍因希望而跳動
現在已經不能夠回頭了啊
向前走吧　踏上沒有你的這條路

_________________________________

巴士

2007-11-20T09:00:00.000+08:00

放工, 由金鐘往銅鑼灣.
剛步進地鐵站, 一轉念, 決定乘巴士去.

原來許久沒有坐巴士.

以前住馬鞍山, 公司在中環.
每天都坐巴士返工. 車程最少三十五分鐘.
遇有打風落雨, 一程車個半小時也說不定.

別人覺得長程車很勞累. 我卻絲毫不以為苦.
反而很享受每天的行車時間.
主要原因是因為我是在巴士總站上車, 一定有位坐.
三十五分鐘的車程, 可以很舒適安穩地安排一天的事.
又或者睇書, 打機, 發呆, 睇roadshow, 睡覺...

返工一程, 放工一程,
都是計劃一天及總結一天的時光, 很寶貴的私人時間.

現在每天返工放工都是乘地鐵. 就乏味得多了.
坐巴士, 是有遊歷的, 是迂迴曲折的, 是travel,
坐地鐵, 是沒有遊歷的, 是點對點的, 是transit.

那是 distance 與 displacement 的分別.

記得以前中學時候, 巴士未有冷氣, 室內場所也未禁煙,
放學後和同學仔泡完遊戲機中心, 滿身煙味, 回家一定會被識穿.
故此, 當坐巴士回家時, 我們都會跑到樓上最前的位置,
將前面車窗全開, 開車時猛風吹來.
回到家時, 總能把身上煙味吹散.
不過有時車速太高, 風太大,
把坐在後排的人吹得頭暈轉向, 也挺惹人厭.

現在, 沒有冷氣的巴士幾乎絕跡,
上層前排的車窗也沒有了.
可幸是所有室內場所已禁煙,
但今天我要去泡遊戲機中心, 誰會管我?

坐巴士多了, 對於選擇巴士的座位, 會有一點要求.

首先, 我一定坐上層, 主要原因是因為我自私.
坐下層, 多有老弱孕婦, 每次見到我總會讓座,
而為了保障我全程可以安坐車中,
非迫不得已, 我一定坐上層.

另一個原因是我又怕熱又怕焗促, 上層冷氣較涼.
沒有企位, 人較少, 感覺比較鬆動.
而且車窗又多又大, 能開揚望遠. 感覺遠比下層好.

其次, 我一定揀巴士左手邊的窗邊座位,
因為靠近行人路, 比較多野睇~
坐靠右的呢, 只能看來來往往的汽車, 很無聊.
所以, 通常樓上靠左邊的位置都比靠右的先坐滿,
大概人同此心, 不信你下次留意一下.

另外, 如果是長程巴士,
就要視乎巴士的座位是有頭枕還是沒有頭枕.
座位有頭枕固然絕佳. 若果是沒有頭枕的話,
就要選近通道並裝有垂直扶手杆的位置.
因為樓上不淮站立, 扶手杆不會有太多人使用.
當沒有頭枕又想睡覺時, 可以安心地把頭枕於杆上.
雖然很硬, 但總比無依無靠好.

昨晚短短一程, 地鐵大概只需六分鐘就了事.
坐巴士卻行行停停的, 花了整整半小時.

Road Show 螢幕沒有開,
在寧靜的車廂內, 望著車窗外的光景, 覺得相當舒泰.

畢竟, 能浪費時間, 是最奢華的享受.

那是只花 $3 的浪漫.

作文

2007-11-16T09:13:00.000+08:00

你相信小朋友對未來有特別的感應或預知能力嗎?

初中作文, 題目大多老土,
曾經有一篇叫什麼"搬家記"的.
八百至一千字一篇, 一堂四十分鐘內就要交貨.

愛胡思亂想的人, 腦中多有古靈精怪念頭,
而多口的人愛發表, 也大多是愛作文的.
我愛胡思亂想又多口, 作文胡扯最拿手.

當年可不像現在寫BLOG 那樣,
想到什麼就先瞎七搭八的全打出來,
之後再 copy and paste 重組文章.
那時尚可在腦中計算好起承轉合, 字數長短.
擬定腹稿, 下筆成文, 從不起草.
今天反而沒這種能耐.

因為白石難民營在馬鞍山,
而當時馬鞍山剛開始發展, 新聞常有報導.
家住葵盛的我, 只聽聞過有馬鞍山這個地方, 卻從未到過.
也許是神推鬼擁, 那篇搬家記, 就說自已一家四口,
由葵盛搬去馬鞍山, 由公屋搬去居屋, 由無房變成兩廳三房.
因為各人可以把自已關起來. 關係也由親密轉為疏離...

由記事開始, 繼而舒情的文章,
在中學年代, 多能獲得高分數.

兩年後, 我們真的舉家搬到馬鞍山,
新居的環境, 景觀, 佈局, 都跟我當日所描繪的一模一樣.
當日還清楚寫出, 從我家能遠眺白石難民營. 分毫不差.

可惜的是, 家人的關係, 也如當日所寫的一樣, 可謂一語成讖.

忽然醒起呢篇文章.
大概人到左咁上下年紀, 就會回憶.
久不久就會有一點點一點點過去寧碎的,
沒有多大意義的片段會閃過.
就像我今天一樣.

自閉

2007-11-15T21:57:00.000+08:00

昨晚在家打邊爐, 係新奇既FUSION邊爐
食法係介乎芝士火窩同中式火窩.
用罐頭忌廉蘑菇湯做底, 去點麵包同淥菜...

開好枱開好爐,
一如以往, 夫婦倆相當之自閉,
我對住部 MAC, 要食野先行埋爐邊,
太太就直頭係爐邊開住部 LAPTOP, 行都唔駛行...

我: (對住部 MAC) 尋日阿朋友B 無啦啦中左抽到個二獎, 拎左部 HTC TOUCH.
佢: (對住部 SONY) 嘩~ 咁好野! 但佢又唔用, 部機點算?
我: (對住部 MAC) 部機賣左俾朋友Z 個太太.
佢: (對住部 SONY) 朋友Z 個太太... 哦... 我成日撈亂左朋友Z 同朋友R 個太太既樣.
我: (對住部 MAC) 朋友R 個太太好少出現, 好似只出現過一次.
佢: (對住部 SONY) 邊次?
我: (對住部 MAC) 好似只係邊個邊個開檔果次出現過. 印象中都係幾靚架~
佢: (對住部 SONY) 咁朋友Z 太太即係葉蘊儀丫嘛~ (小朋友既類比法) 點解你D 朋友既老婆都咁靚既?
我: (對住部 MAC) (諗起一干人等, 心生妒忌) 可能係人越柒, 老婆就越靚掛~
佢: (對住我) ...咁... 老公你柒唔柒呀?
我: (對住佢) ......
佢: (對住部 SONY) 我諗, 不如你柒多少少啦......

<< 自閉夫婦生活對話之一>>

__________________________________________

繼續打邊爐...
我對住部 MAC, 佢對住部 SONY...

我: (對住佢) (睇準時機, 忽然興奮地~) 老婆! 我都係想買 X-BOX呀~
佢: (對住我) ......
我: (對住佢) ......
我: (對住部 MAC) WOO~~~ 唔買LU~~~
佢: (對住部 SONY) 老公, 我地唔可以好似小朋友咁, 人地有咩玩具, 我地就要有咩玩具架嘛~
我: (對住部 MAC) ......
佢: (對住部 SONY) 人地有 CANON DSLR, 你又要有, 人地有LEICA, 你又要有, 人地有WII, 你又要有, 咁唔得架嘛...
我: (對住部 MAC) 咁都係既...... 其實我都有諗過唔要套CANON......
佢: (對住部 SONY) 你唔好扮野喇老公, 你唔要套 CANON , 只係想買LEICA M8 之嘛~~
我: (對住部 MAC) ......
佢: (對住部 SONY) 你話有邊個有齊晒你咁多玩具丫~
我: (對住部 MAC) ......咁都係既......
佢: (對住部 SONY) 我地要儲多D 錢, 唔係第時有小BB 點算?
我: (對住部 MAC) (忽然醒起) 丫~ 係呀~ 朋友A 幫你問左個WII FIT 幾錢喇喎~
佢: (對住部 SONY) (雙眼開始發光) 係? 幾錢呀?
我: (對住部 MAC) $880, 仲要未必有貨
佢: (對住部 SONY) 都差唔多啦~
我: (望住佢) YEN 價 8800, 成十算喎~
佢: (對住部 SONY) OK 啦~個WII FIT 好多野玩架~ 可以... 又可以...仲可以...... (下刪四百字)
我: (望住佢) 咁...即係買呀?
佢: (對住部 SONY) 係呀~
我: (望住佢) (不懷好意地笑) ......
佢: (望住我) ......
佢: (望住 SONY) 咩喎~ 咁呢樣玩具, 你D朋友無人有丫嘛~~

<< 自閉夫婦生活對話之二>>

借書

2007-11-14T09:10:00.000+08:00

回到舊公司, 過往的BUDDIES 不再共事同一PROJECT.
少了出雙入對. 午飯時間也樂得清閒.
一條友食飯只係十五分鐘, 仲有餘下既九個字無野做,
結果幹起了中學時的勾當 - 泡圖書館.

怎樣? 很長進, 是吧~

以前中學附近就是公共圖書館, 放學就往圖書館泡.
正經學科書少借, 最愛的就是跑到衛斯理及哲學書架中.
中五會考完畢後的暑假, 曾經在圖書館中當圖書館管理員.
所以, 對公共圖書館, 有一定的個人感情.

上大學後, 校內圖書館比公共圖書藏書更多,
已絕少到公共圖書館. 絕跡近十年.

近日再到公共圖書館, 一切都無太大改變.
繳交過期罰款,仍然係要自已入錢落個木箱入面.
最有趣的就是借書電腦化, 用身份証就可以借書,
又可以用一部借書機, 自助辦理借書手續, 相當好玩.

然而隨著社會既富裕, 以及互聯網既興起,
年輕一輩的知識,再不一定需要從書本中獲得
圖書館就變成了知識型師奶以及退休人仕嘆冷氣,
睇免費報紙雜誌, 消磨時間既好地方.
大概我老來退休也會如此過日晨.

公共圖書館比起大學圖書館優勝既地方, 就係閒書較多.
從架上擺放的書刊看來, 現在新書出版後上架的速度,
並不比坊間慢上多少. 相當不俗.

另外, 以前最新有關電腦教學的書藉, 多半一早給人借去.
現在卻乏人問津, 大概有問題都往網上去尋答案了.

那天, 在架上借了一本閒書 "why we blog"
講及何謂BLOG, 訪問一下唔同階層, 唔同形式既博客.
亦有好多唔同風格既BLOG 介紹, 可以作為一個部落格小指南.
當中有介紹網友洪雄熊既熊之秘蜜夢工廠
亦有誠意推介俾球迷告白 Anthony 兄既ohcl的足球部落格 (卷首照片相當吸引~)
另外亦有我最愛看既遊記blog, 文化blog 及懷舊blog,
例如: 秀秀, be g:reen, 加路思想簿, 京都事變等.

讀此書介紹blog tag 一文時又發現,
原來事有湊巧, 日前的一篇"書緣", 曾經係一個blog tag既題目.
可惜我遲了整整一年. 如果唔係可以湊湊熱鬧. 拉拉車邊增加人氣.

全書介紹既 blog 都係sina blog, 因為由新浪網 mysinablog 編著.
版稅收增扣除成本, 全數捐贈"苗圃行動"以幫助中國山區學童.

其實, 係唔係應該買番一本, 而唔係去借呢...

書緣

2007-11-06T11:13:00.000+08:00

看書, 是要有緣, 才看得下去.
就算是好書, 沒有緣, 丟在地上也不會去碰它.

愛看書, 因為小時候老父給我買老夫子.
很好看, 最少學懂了什麼叫"耐人尋味"
十篇老夫子中, 總有一兩篇叫"耐人尋味"

之後就看漫畫: 牛仔, 叮噹 (打死我也不叫見鬼的"多啦A夢"!)
別人看土炮龍虎門醉拳如來神掌壽星仔的時候, 我碰也不碰.
那薄薄的鬼五馬六的土產漫畫, 多沒文化!
我只看漫畫週刊及A-Club, 當年算是很"潮'的.

文字書方面, 初中最愛畢華流, 覺得健康又正氣.
今天睇番主席手記看仍會忍唔住笑. 屋企有許多畢華流的書.
當年書展仲搵佢為整套"荒原三部曲"簽名. 是很忠實的fans.
那套書最後送了給一個女孩. 那女孩今天是我的太太.

同期的梁望峰, 我覺得整天情情愛愛的太沒深度.
不過, 今天他還在寫, 畢華流就不多見了.
大概他與高小梅, 正在更闊的天空下生活著.

上了中學, 看書就愛一系列一系列的看.
刨完金庸就到衛斯理. 古龍也愛看.
都是學好中文的入門書.

當年日本 koei 公司初出電腦版三國誌遊戲.
同學們很著迷, 我也就學著人去玩,
也去弄本大部頭的三國演義來看.
可惜我終歸也不愛玩三國誌,
三國演義到今時今日亦始終看不完. 是為無緣.

慚愧的是, 中國四大名著, 我到今天也沒有一本看得完.
英文書也是, 除了課本, 從不碰.

中學火紅年代, 卻很愛看哲學書藉, 常去圖書館借書.
生吞活剝了不少存在主義, 看完就跟同學辯論.
今天你叫我看哲學書, 我會覺得很頭痛.
當年奉若神明的李天命, 今天再看, 只會輕輕一笑.

大學因為學科關係, 常泡 PAGE ONE,
買日本及外國建築雜誌, 厚厚的一本動輒三四百元.
付鈔的時候, 也買了一份知識分子的優越感.
然而書就只翻幾翻, 鈔完scheme 同 presentation 就算了.
從沒好好看過, 現在家中還有好大堆.
實在對不起各位建築大師.

出來做事, 沒有太好的耐性,
小說哲學都沒興趣. 只愛散文.
蔡瀾是我喜愛的, 每出一本, 我都會買.
只近來年紀大了, 少了年輕時的放浪形骸
很多題目講了又講, 像錄音機.
李碧華也好, 但就是不會買.

近來愛看的, 除左攝影書及影集之外.
就愛看經濟書藉. 可能是人市僧了.
想了解多一點市場是如何運作.
更加不可思議的是, 近日居然有興趣買投資雜誌.
還看得很有興味, 可想而知股災迫近.

現在還持之以恆的, 就是每週都買當年不屑的龍虎門
-- 如果唔係, 去廁所做乜好?

消費

2007-10-29T14:01:00.000+08:00

近來愛看有關經濟學的書.

原來, 經濟學上, 有一項東西叫"炫耀性消費".
即係用錢去買一些本身無甚價值,
又或者面值遠高於本身價值既東西.
用處, 只係虛榮或炫耀.

係經濟學上, 呢樣行為係絕對唔化算既.

例如去外國景點, 花一百幾十影張記念照, 又或者拎張証書.
買果時就好開心, 但可能番到屋企, 已經唔知掉左去邊.
又或者買部好貴既法拉利, 但只係用黎渣80km/h 番工放工.

跟據經濟學原理: 每人都為自已利益最大化而從事經濟活動.
"炫耀性消費"呢種行為, 係唔合付經濟效益既.

另外, 經過一個月既研究.
近日亦終於發現新工司同舊公司既分別. 原來分別係:

新公司: 做得好, 老細會講句 good/ very good.
舊公司: 做得好, 都係丟埋一邊, 永遠覺得你唔夠好. 仲要鬧.

就係為左一句 very good,
我對於新工作係非常投入, 仲成日做到唔願走.

打工本身就係一個以時間去換取金錢經濟活動,
然而, 只要願意少收薪金, 多加工時, 去換取欣賞同讚譽,
一個原本係為自已利益最大化既經濟活動,
亦會同時變成一種"炫耀性消費".

追求"自我滿足"這回事, 本身已經係相當之唔合付經濟原則.

講到底, 成日要人讚, 我都係孩子氣.

片段

2007-10-18T09:13:00.000+08:00

- 好耐無寫網誌, 要再啟動.

- 明日跟團過馬交, 可惜probation 未過, 未有假, 只好星期六早上搭船直返公司.

- 期待星期六損友BBQ家庭聚會.

- 前日致電家母, 告知我已轉工, 言談間勸告我: 做野最緊要開心.

- 上天該是有一份劇本, 甚些對白, 總會在某些時候由某些人講出來.

- 工作上很開心, 很有滿足感. 相信近日表現已贏得上司信任.

- 仍在尋找兩間公司的差異: 人的選擇, 似乎係主觀內在感覺戰勝客觀外圍因素.

- 人係需要由外圍環境告知什麼是"我", 而"我"的形象, 往往是由外間反映而得出來的.

- 好想有部 notebook, 又唔想亂花錢. 努力搵緊"要擁有一部 notebook"的理由. 例如可以勤力d 寫blog...(如果呢個係一個理由既話)

- 最後係: 終於睇晒全套 EVA 新世紀福音戰士. 所以今篇網誌係相當之"碇真治式" 既片段思考.

電話

2007-10-10T09:47:00.000+08:00

連續幾天晚上, 打錯婆婆不斷來電.
大概她又再度搞錯了兒子的電話號碼.

我甚少搵朋友, 父母弟弟也甚少來電.
電話主要用途是和太太連絡, 其次是公事.
平常收到最多的電話, 是cold call.

除左銀行保險之類打來所謂既"特選客戶優惠"外
因為個名同手機號碼落左建築師名冊,
近來又收到有好多古怪既電話.

第一類, 係打來叫你幫手搞拆僭建果類野.
屋宇署久不久就把查僭建既工作外判,
發出的清拆令也是一浪一浪的.
所以通常收到第一個要求查詢清拆事宜既電話後,
往後幾日就會接二連三的不斷收到.
如果得閑而單case 又有趣既,
都會同來電者傾下計俾下意見.
一來覺得學以致用, 可以幫到一般市民,
二來當溫習下有關條例.
另外, 有時小業主同業主立案法團有爭拗時都會搵下你.
尤其是有關業權誰屬既問題, 呢一類就會比較小心.
多數唔多口, 叫佢搵律師算.

第二類, 係打來話你知有新工.
上次有head hunter 打來搵我見工, 以為咁有型有人賞識.
點知原來只係睇名冊見有新豬肉cold call, 即時面紅過耳...
好想一頭撞牆死掉算數.

今日仲奇, 有個國語人打來,
話上海有個大發展商想搵人上去. 聽落就相當似騙局.
早上無時間同佢吹水, 叫佢下午打來.
如果有時間, 聽下佢講咩都好, 可以練下普通話聽講能力.

欲知後事如何, 請看下回分解.

投入

2007-10-08T23:04:00.000+08:00

我的網誌多數是在番工時間寫的.
由於轉會後生活相當之充實, 加上忙於劇務,
所以成個星期都無UPDATE.

雖然母會坊間聲名麻麻,
但不得不承認, 頂尖能幹的人材比起前公司多好多好多,
當你眼見有咁多叻人既時候, 不其然又會擔心自已爬不上去.

人就係咁奇怪, 可以上位搵錢既地方唔留.
係都要去番一個好多人爭上位既地方.
從前, 這是其中一個我離開的原因, 可是今天我又回來了.

另外, 在前公司, 一到六點我同大咪叔叔就一定大逃亡.
只要有幾會可以六點走, 一定唔會留多半分鐘.
然而回歸母會, 我居然有好幾日都係七點先走.
完全自願而且高興. 工作也上心.
比起之前"做又三十六, 唔做又三十六"既心態, 差天共地.

到現在我都不太明白當中既分別是什麼.
就只是因為環境, 因為氣氛, 因為老闆不同了?

我諗左好耐, 最後既結論是: 這裡有我表演的地方.

在前公司只有看大佬的表演,
我只是做拍手小觀眾, 不會有掌聲, 不會被欣賞.
但這裡令我覺得我可以有自已的舞台,
令我覺得自已有價值, 有用處.

就正如我喜歡自已唱KARAOKE, 不喜歡去睇演唱會.
我喜歡落場踢波, 而無咩興趣睇波.
我喜歡能夠自主, 能夠被欣賞.

講到尾, 我都係貪慕虛榮. 追求自我滿足, 自由, 和快樂.

能夠投入工作, 總是令人高興的.
再多一些時間, 我應該可以更投入,
表現得更SHARP更出色.

回巢

2007-10-02T17:03:00.000+08:00

回到老巢, 感覺良好.

仍是那些人, 仍是那些事.
時間像是在一年前停了下來.

雖然是新的工程, 接手並沒有太大既困難.
第一天已開了一整日的會議. 尚可應付自如.
舊同事問我: 點解問咩你都知? 你今日真係第一天番工?

其實, 建造工程不是航天科技, 沒有什麼難度.
來來去去問題都係得幾個, 要應付不難.

"不怕官, 只怕管."
這裡沒有太多人管, 自負盈虧, 我會發揮得較好.
工作上及責任上, 有較實在的感覺.

又原來, 縱使意見不一定會被接納,
但有機會表達意見, 覺得會被尊重, 被聆聽,
覺得自己會有所貢獻, 是一種很重要的自我存在感覺.

打工縱使不是談戀愛,
但沒有感情, 不能投入, 很難開花結果.

一年前我說過:"哪裡人工高就到哪裡去, 至少辛苦有價"
我想這種理念, 並不適合我, 我比較著意個人的存在感.

相當個人主意, 是不是? 我卻喜歡, 覺得挺浪漫.

這幾天再回想當天的 60%, 絲毫沒有後悔的感覺.
反而覺得人工在整件事上, 微不足道.
原來世上真有"感覺富有"這回事.
至少沒有那 60%, 我並不缺少什麼.

反正, 我從來都不曾有過.
本來無一物, 何處惹塵埃?

孩子

2007-10-02T09:09:00.000+08:00

近來夫婦二人的電郵, 收到了很多blog links.
幾乎全都是朋友為新生孩子開立的網誌.
十年唔用一次電郵通訊既同學, 亦興奮地寄來網址.
金豬年的威力果然唔講得笑.

太太笑說看得太多太膩了. 我則無可無不可.
覺得終究是喜事. 為朋友開心一下也好.
只是內容多總是那些"寶寶的第一次乜乜, 第一次物物"
實在多得有點吃不消.
有一個中學同學, 他那個寶寶blog 全是什麼什麼第一次.
連小寶寶第一次玩口水波, 第一次瀨屎也有記載.
圖文並茂. 愛"齷"及"污".

只能說, 沒有小孩子的人, 很難理解新任父母的雀躍.

孩子大得快也早熟, 長大了能言善道, 就不那麼可愛.
總幻想網誌中會有第一次頂咀, 第一次講粗口, 第一次罵父母...
不是黑心, 你我小時都曾忤逆過, 是必然既階段.

養兒一百歲, 長憂九十年.
願意擔起兒女債的人, 真的很偉大, 也看得開.